Qazaqta 150-den astam ulttyq sport túri bolǵan
Ulttyq oıyndar – babalarymyzdan qalǵan asyl qazyna. Dana halqymyz bala tárbıesine úlken mán berip, jastaıynan sportqa baýlyǵan. Ǵalymdardyń zertteýinshe, qazaqta 150-den astam ulttyq oıyn túri bolǵan, dep habarlaıdy Almaty-akshamy.kz Almaty.tv–ge silteme jasap.
Alaıda kóbi el esinen shyǵyp, umytylyp ketti desedi. Soǵan qaramastan osy jolda aıanbaı eńbek etip, ulttyq sportty barynsha dáriptep júrgen jandar barshylyq.
Búginde ulttyq oıyndar birtindep qaıta jańǵyryp keledi. Olardyń qatarynda dástúrli sadaq atý, asyq oınaý jáne láńgi tebý men arqan tartys bar. Qazirgi keıipker de atalmysh sport túrlerin qolǵa alyp, qaladaǵy aýa raıynyń qolaısyzdyǵyna qaramastan almatylyqtarǵa jabyq alańda merekelik kóńil-kúı syılaýda.
Qazaq halqy ejelden ulttyq oıyndarǵa baı halyq. Onyń bastaýy tym tereńde, ǵasyrlar qoınaýynda jatyr. Búginde umyt bolǵan oıyn túrlerin Meırambek Rýslanov dáriptep júr. Ol 2 jyldan beri osy salada eńbek etip keledi.
«Qazir qazaqı ulttyq kıimder, ulttyq sport túrleri jaqsy damyp jatyr. Sony ári damytýǵa azdap úles qosyp jatqan jaıymyz bar. Bul – bala kezden bergi hobbıim. Ózimiz aýyldan shyqqannan keıin ulttyq oıyndardy kóterý maqsatynda kókpar da uıymdastyryp turamyz», – dedi uıymdastyrýshy Meırambek Rýslanov.
Sharada ulttyq sporttyń birneshe túri oınatyldy. Kópshilik kóńili sadaq atý men asyq oınaýǵa aýdy. Uıymdastyrýshylar áýeli qatysýshylarǵa sadaq tartýdyń qyr-syryn úıretti. Qazaq halqy ejelden jaýyngerlerdiń mergendik qabiletin jetildirý úshin atalmysh sporttan bólek, jamby atýdy oılap taýyp, jarystar ótkizgen. Ol bir jaǵynan áskerı daıyndyqty nyǵaıtý bolsa, ekinshi jaǵynan ulttyq rýhty oıatady.
Sadaq atý – qazaqtyń qanynda bar ulttyq oıyndardyń biri. Bul sporttyq qurylǵy adamdy mergendikke, tózimdilikke jáne shydamdylyqqa tárbıelep, symbatty dene bitimin qalyptastyrady.
«Ulttyq oıyndardyń ótetinin estip, Almaty arnaıy keldim. Osyndaı oıyndardy jıi-jıi ótkizip tursa deımin. Ulttyq sportymyzdy osylaı dáriptep, madaqtap, órkendete berýlerińizge tilektespin», – dedi qala qonaǵy Erjan Isa.
Uıymdastyrýshylardyń aıtýynsha, sońǵy ýaqytta ulttyq sportqa qyzyǵatyn qyzdar qaýymy artyp keledi. Solardyń biri – Náılá Saılaýbekqyzy. Ol bala kezinen saq patshaıymy Tomırıs pen áıgili Qabanbaı batyrdyń qyzy Nazymǵa eliktep, at pen sadaqqa mashyqtanyp ósken.
«Mende sadaq atyp, atpen shapqan kezde keremet rýh, keremet sezim paıda bolady. Sol sebepti osy sporttyń tańdadym. Áli kúnge deıin atpen, sadaqpen aınalysyp jatyrmyn», – dedi sportshy Náılá Saılaýbekqyzy.
«Ulttyq oıyndardyń dáriptelýi bolashaq urpaqqa qazaqtyń rýhyn sińirip ósýine septigin tıgizedi», – dedi qala turǵyny Aıdana Aqyltaeva.
Shara sońynda uıymdastyrýshylar almatylyqtardy merkemen quttyqtap, Naýryz kójeden dám tatqyzdy.