Alǵan taýar sapasyna narazy bolyp, shaǵymdanǵandar sany ósken.
Qazaqstandyqtardyń quqyqtyq saýattylyǵy men tutynýshylyq mádenıeti aıtarlyqtaı ósip keledi, dep habarlady Almaty-akshamy.kz Kapital.kz silteme jasap.
Almaty qalasy Tutynýshylardyń quqyqtaryn qorǵaý departamentiniń dırektory Nurlybek Bımýrzaevtyń aıtýynsha, ótken jylmen salystyrǵanda tutynýshylar tarapynan túsken shaǵym kólemi aıtarlyqtaı ósken.
«Shaǵym jazatyn azamattardyń basym bóligine taýardyń sapasy men kórsetilgen qyzmet sapasy unamaıdy. Jalpy respýblıka boıynsha 2022 jyldyń birinshi jartyjyldyqta 11595 ótinish kelip túsken. Bul 2021 jyldyń sáıkes kezeńimen salystyrǵanda 42%-ǵa kóp (8 164 ret qaraldy). Aıyna tutynýshylardyń ótinishteri aımaqqa baılanysty 20-35 paıyzǵa artyp keledi. Almaty qalasy boıynsha departament 6 aıda 1470 ótinishti qarady, onyń 766-sy jazbasha, 87-si telegram boty arqyly, 638-i e-otynysh onlaın úndeý júıesi arqyly», - deıdi Nurlybek Bımýrzaev.
Tutynýshylardyń quqyqtaryn qorǵaý komıtetiniń málimetinshe, ótinishterdi qaraý qorytyndysy boıynsha ústimizdegi jyldyń alty aıynda qazaqstandyqtarǵa sapasyz taýarlar men qyzmetter úshin 408 mln teńge qaıtarylǵan. Onyń tórtten birinen astamy – 104 mıllıon teńge derlik – Almatynyń úlesine jatady.
Tutynýshylardyń quqyqtaryn qorǵaý departamentiniń mamandary qazirgi kezde memlekettik organdardyń shaǵyn kásipkerlik sýbektilerin tekserýine moratorıı jarıalanǵanyn eske saldy. Sondyqtan josyqsyz kásipkerlerdiń áreketine jaýap berý sharalary olardyń áreketinen zardap shekken jeke tulǵanyń ótinishinen keıin ǵana qabyldanýy múmkin. Azamattardyń ótinishterin jedel qaraý úshin arnaıy platformada onlaın rejıminde shaǵym túsirýge bolady.
«Tutynýshylardyń quqyqtaryn qorǵaý týraly» Zańǵa ázirlengen túzetýlerdiń 2-shi paketi tutynýshylyq quqyqtardy qorǵaý júıesindegi quqyqtyq olqylyqtardy joıýǵa, halyqtyń quqyqtyq saýattylyǵyn arttyrýǵa, sondaı-aq taýarlar men qyzmetter sapasynyń ósýine yqpal etetin bolady. Zań jobasyn talqylaýǵa barlyǵy ashyq NQA portalynda qatysa alady.
Tutyný quqyǵyn buzý týraly shaǵymdy «E-tutynushy» onlaın-servısiniń kómegimen berýge bolady. Komıtet mamandarynyń konsýltasıasy tegin «jedel jeli» telefondary arqyly júzege asyrylady: 8-7172-74-98-32, 8-7172-74-98-36.
Qazaqstan úkimeti qazaqstandyqtardyń tutyný quqyǵyn qorǵaý maqsatynda stýdentter arasynda tutynýshylardyń quqyqtaryn qorǵaý máseleleri boıynsha kýrstar ótkizip jatyr.
Kýrstar Qazaqstan Respýblıkasy Saýda jáne ıntegrasıa mınıstrligi Tutynýshylardyń quqyqtaryn qorǵaý komıtetiniń qoldaýymen, «Oqytý qyzmetterin kórsetý arqyly tutynýshylardyń quqyqtaryn qorǵaý máseleleri boıynsha halyqtyń aqparattyq-aǵartý jumysy» áleýmettik jobasy aıasynda ótkizilýde.
Bul kýrs stýdentterdiń kelesi maqsattaryna qol jetkizýge qyzmet etedi: tutynýshylardyń quqyqtaryn qorǵaý salasyndaǵy qatynastardy retteıtin normatıvtik quqyqtyq aktilermen jumys isteý daǵdylaryn jetildirý, tutynýshylardyń quqyqtaryn qorǵaý týraly zańnamany qoldaný praktıkasyn zerdeleý, zańdy sanattardy tujyrymdaý jáne ajyratý, odan ári zań shyǵarý jumysy úshin zańdardy durys qoldaný daǵdylaryn damytý.
Shyǵys Qazaqstan oblysynda 2022 jyldyń 7 qarashasy men 15 qarashasy aralyǵynda Sársen Amanjolov atyndaǵy Shyǵys Qazaqstan ýnıversıtetinde kýrs uıymdastyrylýda. Avtory, kýrs oqytýshysy/treneri: zań ǵylymdarynyń kandıdaty Ramazanova Aınýr Serikhanqyzy.
Batys Qazaqstan oblysynda 2022 jyldyń 7 qarashasy men 15 qarashasy aralyǵynda «Tutynýshylardyń quqyqtaryn qorǵaý» kýrsyn Batys Qazaqstan ınovasıalyq-tehnologıalyq ýnıversıtetiniń stýdentteri oqyp bastady. Kýrsty tájirıbeli maman, «Batys Qazaqstan oblystyq tutynýshylardyń quqyǵyn qorǵaý boıynsha qoǵam» qoǵamdyq birlestiginiń tóraıymy Telagısova Darına Shaýmuratqyzy júrgizedi.
Almaty Menedjment Ýnıversıtetinde ótilip jatqan «Tutynýshylardyń quqyqtaryn qorǵaý» kýrsy aıaqtalý kezeńine jetti. Stýdentter atalǵan kýrs boıynsha emtıhan tapsyrdy.