Jármeńke saǵat 08:00-den 17:00-ge deıin bolady.
2022 jylǵy 23-24 qazanda Almatyda Túrkistan oblysy aýylsharýashylyq taýarlaryn óndirýshileriniń keńeıtilgen jármeńkesi ótedi. Almatylyqtarǵa óziniń ónimin Túrkistan oblysynyń 14 aýdany men 2 qalasynyń (Arys, Kentaý) fermerleri usynady, dep habarlaıdy Almaty-akshamy.kz.
Fermerler usynatyn assortıment et-sút, jemis-kókónis, shujyq ónimderiniń, sondaı-aq un, jarmalar, ósimdik jáne janýarlar maıy men basqa da ónimderdiń 50-den astam ataýyn qamtıdy.
Ónimniń jalpy kólemi 367 tonnany quraıdy:
- et ónimi – 55 tonna;
- jemis-kókónis ónimi – 190 tonna;
- sút ónimi – 25 tonna;
- balyq ónimi – 5 tonna;
- ózge de ónimder – 92 tonna.
Jármeńke saǵat 08:00-den 17:00-ge deıin Shevchenko kóshesiniń boıynda Qonaev kóshesinen Pýshkın kóshesine deıingi («Ǵylym ordasy» RMO Arheologıa murajaıyna qarama-qarsy) mekenjaıda ótedi.