13 myńnan astam qazaq qandas mártebesin aldy.
Qazaqstan Úkimeti bir jylda qansha qazaqtyń elge oralǵanyn aıtty, dep habarlaıdy Almaty-akshamy.kz.
«2022 jylǵy 1 qazandaǵy jaǵdaı boıynsha, 13 362 etnıkalyq qazaq tarıhı otanyna oralyp, qandas mártebesin aldy. 1991 jyldan bastap respýblıkaǵa barlyǵy 1 mln 101,2 myń etnıkalyq qazaq oraldy», - delingen Eńbekmıni baspasóz qyzmetiniń habarlamasynda.
Osy jyldyń basynan bastap Qazaqstanǵa kelgen qandastardyń jartysynan astamy (68,7%) Ózbekstannan, 10% – QHR-dan, 7,9% – Túrkimenstannan, 4,6% – Mońǵolıadan jáne 8,8% - basqa elderden.
Kelgen etnıkalyq qazaqtar negizinen Almaty (29,9%), Mańǵystaý (16,7%), Túrkistan (9%) jáne Jambyl (6,5%) oblystarynda, sondaı-aq, Astana (7,8%), Shymkent (7,3%) jáne Almaty (5,8%)qalalarynda qonystandy.
Osy jylǵy 1 qazandaǵy jaǵdaı boıynsha, eńbekke qabiletti jastaǵy etnıkalyq qonys aýdarýshylardyń sany 58,9%-dy, eńbekke qabiletti jastan kishi adamdar 27,5%-dy jáne zeınetkerler 13,7%-dy quraıdy.
Eńbekke qabiletti jastaǵy qandastardyń bilim deńgeıi boıynsha 13,2%-y joǵary bilimdi, 38,9%-y arnaıy orta bilimdi, 46%-y jalpy orta bilimdi jáne 1,8%-ynyń bilimi joq.