Almatynyń «Abaı» alańynda týrnıkke tartylýdan Tartyl Fest respýblıqalyq festıvali ótip jatyr. Bul shara QR Prezıdentiniń janyndaǵy «Dara» talanttardy qoldaý qory men Almaty ákimdigi qoldaýymen alǵash ret ótkizilip otyr.
Tartyl Fest festıvalin ótkizýdiń basty maqsaty – Memleket basshysynyń tapsyrmasy boıynsha jastar men jasóspirimder arasynda sportty damytý, sportpen shuǵyldanatyn turǵyndar sanyn arttyrý, salaýatty ómir saltyn qalyptastyrý.
«Abaı» alańynda saǵat 9:00-den bastap qatysýshylardyń salmaǵy ólshenip, olarǵa nómirler berildi. Festıválge qatysýshylarǵa bir ǵana talap qoıylady, ıaǵnı erejege saı qatysýshylar arasynda týrnıkke eń kóp tartylý. Saıysshylar salmaǵy men jasyna baılanysty 9 sanatta jarysady. Jarys resmı tóreshiler alqasynyń qatysýymen ótedi.
Saıysqa 55 kg men 80 kg aralyǵynda 18 jasqa deıingi jasóspirimder qatysady. Sondaı-aq 80 kg men 90 kg joǵary 30 jastan asqan eresekter de qatysa alady.
Festıvál 10 shilde men 6 qyrkúıek aralyǵynda elimizdiń 20 qalasynda ótedi. Ár qalada 27 jeńimpaz tańdalady.
Aıta keteıik, bul shara Almaty qalasynda óte belsendi túrde ótýde. Óıtkeni qatysýshylar sany jóninen Almaty kósh bastap tur. Qalalyqtar tańerteń erte kelip, salmaqtaryn ólshetip, saıysqa qatysýǵa nıeti joǵary ekenin baıqatty. Festıválge almatylyqtar óte kóp jınalǵan.
Eske salaıyq, birinshi oryn jeńimpazyna 200 myń teńge aqshalaı syılyq, ekinshi oryn úshin – 100 myń teńge, úshinshi oryn úshin – 50 myń teńge beriledi.
Óńirlerden iriktelgen jeńimpazdar astanada ótetin grand-fınalǵa qatysady, júlde qory – 54 mln teńge. Al jarys chempıony Street Workout boıynsha álemdik chempıonatqa Qazaqstannan joldama alady.