Almaty qalasy Jastar saıasaty basqarmasy máslıhat depýtattary jáne qoǵam belsendilerimen birlesip almatylyq stýdentteriniń qonystaný oryndaryna monıtorıń júrgizdi. Stýdentterdiń jataqhanalarda, qonaq úılerde jáne hostelderdegi jaǵdaıdy kózben kórdi, dep habarlaıdy almaty-akshamy.kz
Almaty qalasynda 35 joǵary oqý orny bar, onda 197 myńnan astam stýdent bilim alady, onyń 126 myńnan astamy basqa qalalardan. Qalada 98 stýdenttik jataqhana jumys isteıdi, onda 31 myńnan astam stýdent turady. Bul rette, 32 myń oryn tapshylyǵy bar.
«Stýdentterdi jyl saıynǵy kóbeıýin eskerip, biz qysqa jáne uzaq merzimdi sıpattaǵy belgili bir júıeli sharalardy daıyndadyq. Stýdenttik jataqhanalardaǵy oryn tapshylyǵyn ońtaıly sheshý úshin oqý jylynyń basynda ákimdik Almaty qalasynyń týrızm basqarmasymen birlesip qonaq úıler men hostelder daıyndalyp, 10 myń stýdentke oryn berildi», - dedi Almaty qalasy Jastar saıasaty basqarmasynyń basshysy Qaıyrjan Meńdiǵalıev. Onyń aıtýynsha, búginde birqatar hostelde bos oryndar bar, mysaly, House of the students-te 170 oryn. Q. Meńdiǵalıev qonaq úı bıznesiniń keıbir nysandaryn keleshekte stýdenttik jataqhanalar retinde jańǵyrtý josparlanyp otyrǵanyn habarlady. «Halyqaralyq ınjenerlik-tehnologıalyq ýnıversıtet 118 oryndyq «Sarbaz» qonaq úıimen seriktestik ornatady, bolashaqta bul qonaq úı stýdenttik jataqhana bolyp qaıta qurylady», – dedi ákimdik ókili.
JOO-lar men ınvestorlarǵa jataqhanalar salý kezinde qoldaý kórsetý úshin bıyl naýryz aıynda Almaty ákimdigi Ǵylym jáne joǵary bilim mınıstrligimen birlesip jobalyq keńse qurdy.
«Stýdenttik jataqhanalardy salý boıynsha jobalyq keńse iske qosylǵan sátten bastap bizge 107-den astam áleýetti ınvestor júgindi, bul qoldaý tetiginiń tıimdiligin kórsetedi. Qazir 47 joba qaralyp jatyr, 2 nysan iske qosyldy. Bıyl 15 qyrkúıekke deıin 900 oryndyq jataqhana ashýdy kózdep otyrmyz. 2023 jyldyń sońyna deıin 3939 orynǵa arnalǵan 16 nysandy paıdalanýǵa berý josparlanǵan», – dedi Qaıyrjan Meńdiǵalıev.
Almaty joǵary oqý oryndarynda stýdentterdi jataqhanaǵa ornalastyrýǵa arnalǵan onlaın platforma bar. Buǵan qosa, árbir JOO-da stýdentterdiń birlesip qonystaný úshin chattar ashylǵan jáne tárbıe jumysy jónindegi prorektorlar jetekshilik etetin stýdentterdi jataqhanalarǵa ornalastyrý jónindegi jedel shtab jumys isteıdi. Ári senim telefondary da bar.
Sonymen qatar, stýdentterdiń turǵyn úı máselesin sheshý úshin Ahýaldyq ortalyq jumys isteıdi. Qazirgi tańda Call-ortalyq arqyly Almaty qalasy boıynsha 4 myńnan astam qońyraý óńdeldi. Ahýaldyq ortalyqtyń baılanys nómiri mynaý: +7700 255 14 43, +7707 666 00 37.