Almatynyń Respýblıka saraıynda qala turǵyndary qyrǵyz ádebıetiniń dara tulǵasy, klasık jazýshy Shyńǵys Aıtmatovtyń 100 jyldyǵyna arnalǵan erekshe mýzykalyq qoıylymdy tamashalady, - dep habarlaıdy aqshamnews.kz tilshisi.
Kórermenge usynylǵan bul tartý - Qyrǵyzstannyń Toqtaǵul Satylǵanov atyndaǵy Ulttyq fılarmonıasynyń shyǵarmashylyq ujymy daıyndaǵan "Jámılá" múzıkli. Ótken kóktemde Qyrǵyzstan sahnasynda tusaýy kesilgen spektákl bıyl alǵash ret almatylyq aǵaıynmen júzdesti.
Kesh shymyldyǵy Memlekettik keńesshi Erlan Qarınniń quttyqtaý sózimen ashyldy. Ol óz sózinde qazaq pen qyrǵyzdyń tamyrlas, taǵdyrlas halyq ekenine toqtaldy.
"Búgin Respýblıka saraıynda ótip jatqan bul erekshe kesh - eki eldiń rýhanı baılanysyn nyǵaıtatyn mańyzdy oqıǵa. Prezıdent atap ótkendeı, qazaq pen qyrǵyz - baýyrlas jurt. Bizdiń birligimiz tarıhta iz qaldyrǵan ortaq tulǵalarmen, mádenıet, dástúr jáne ónermen bekemdelgen. Keshe Osh qalasynda Abaı mýzeıiniń ashylýy osynyń bir dáleli bolsa, búgin mine, Almaty sahnasynda "Jámılá" múzıkli qoıylyp otyr", - dedi Erlan Qarın.
Qyrǵyz Respýblıkasynyń memlekettik hatshysy Marat Imanqulov ta bul premeranyń eki halyqtyń dostyǵy men ózara qurmetiniń nyshany ekenin atap ótti.
"Shyńǵys Aıtmatovtyń esimi qyrǵyz ǵana emes, qazaq mádenıeti úshin de aıryqsha qymbat. Onyń shyǵarmashylyǵyn alǵash bolyp qoldap, baǵasyn bergen - qazaq sóz óneriniń alyptarynyń biri Muhtar Áýezov. Sondyqtan dál osy múzıkldiń Almatyda sahnalanýynyń ózi tereń mánge ıe", - dedi ol.
"Jámılá" - Jámılá men Danıardyń názik te náýbetti mahabbat tarıhyn Seıit esimdi jigittiń kózimen baıandaıtyn shyǵarma. Jyldar boıy san rejıserge shabyt bergen bul poves sahnada jańa tynys alyp, múzıkl janrynda qaıta tirilgendeı boldy. Qoıylymda adamdyq qadir-qasıet, bir-birine súıeý bolý, rýhanı beriktik pen tózim ıdeıalary erekshe aıshyqtalady. Bul sezimder kórermenge tek akterler oıyny arqyly emes, mýzyka, án men bı arqyly da jetti.
Danıardyń beınesin - Quralbek Chokoev, Jámıláni Syrǵa Saǵynbekova somdap shyqty. Horeografıalyq sheshimderge bas baletmeıster Erlan Qamytbekov jetekshilik etti. Zalǵa jınalǵan jurt ulttyq naqyshtaǵy túpnusqa mýzykanyń qyrǵyz fólklorymen ushtasýyn, tarıhı kostúmder men sahnalyq kórkemdeýdiń úılesimin tamashalaı otyryp, keıipkerlerdiń ishki jan kúızelisi men qýanysh-qaıǵysyn tereń sezine aldy.
Bul premera kórermenge rýhanı serpilis pen estetıkalyq lázzat syılap qana qoıǵan joq, mádenıetaralyq dıalogty jandandyryp, qazaq-qyrǵyz baılanystaryn jańa beleske kótergen mańyzdy oqıǵa retinde este qaldy.
Shyńǵys Aıtmatovtyń júz jyldyq mereıtoıyna arnalǵan bul múzıkl búginde halyqaralyq aýqymdaǵy mádenı bastamaǵa aınalyp keledi. Almatydaǵy qoıylymnan keıin "Jámılá" Baký, Tashkent, Ankara jáne Eýropanyń birneshe qalasynda sahnalaný josparlanyp otyr.