2022 jylǵy 15 aqpanda Almatyda Qazaqstan tarapynyń bastamasy boıynsha Qazaqstan, Qyrǵyzstan men Reseıdiń keden jáne salyq qyzmetteriniń úshjaqty kezdesýi ótti. Kezdesý taqyryby úsh eldiń salyq jáne keden qyzmetteriniń is-qımyldaryn tıimdi úılestirýdi qamtamasyz etý máseleleri boldy. Kelissózder delegasıasyn Qazaqstan Respýblıkasy Premer-Mınıstriniń orynbasary – Saýda jáne ıntegrasıa mınıstri Baqyt Sultanov basqardy, dep habarlaıdy Almaty-akshamy.kz primeminister.kz silteme jasap.
«Sońǵy ýaqytta EAEO naryǵynda qytaı taýarlarynyń "sur" aınalymynyń ulǵaıý úrdisi baıqalýda. Mundaı úrdis bizdiń elderimizdiń úkimetteri tarapynan tıisti nazarsyz qala almaıdy», — dep atap ótti B. Sultanov.
Ol «sur» ımporttyń ulǵaıýyna alyp keletin syn-tegeýrinderge: búdjetke salyqtardyń tolyq túspeýine, odaq naryqtaryna kontrafaktilik, sapasyz jáne keıde qaýipsiz emes ónimderdi ákelýge nazar aýdardy.
«Bul faktor ózara saýdadaǵy básekelestik naryqtyń damýyna teris áser etedi, bul, saıyp kelgende, ekonomıkanyń jekelegen osal salalarynyń damýyna qaýip tóndiredi», — dep túıindedi B. Sultanov.
Qyrǵyzstannan kelissózderge keden jáne salyq qyzmetteriniń birinshi basshylary qatysty. Qyrǵyz delegasıasyn Mınıstrler kabıneti tóraǵasynyń birinshi orynbasary Arzybek Kojoshev basqardy. Reseı tarapynan qarjy mınıstriniń orynbasary, stats-hatshy Alekseı Sazanov bastaǵan keden jáne salyq qyzmetteriniń basshylyǵy qatysty.
Kezdesý aıasynda sarapshylar deńgeıindegi taraptardyń otyrysy jáne delegasıa basshylarynyń qatysýymen keńeıtilgen quramdaǵy keńes ótti. Kelissózder barysynda taraptar Qazaqstan men Reseı Qarjy mınıstrlikteri deńgeıindegi ózara ýaǵdalastyqtardy iske asyrý boıynsha qosymsha sharalardy ázirleı otyryp, ótken jylǵy kezdesýdiń qorytyndylaryn talqylady.
Qazaqstan, Qyrǵyzstan jáne Reseı arasynda aqparat almasý máseleleri qaraldy. Taraptar ózara is-qımyl prosesin uıymdastyrý úsh eldiń kóleńkeli ekonomıkasymen kúres jónindegi ózekti máselelerdi sheshýge múmkindik beretinin atap ótti.
Kún tártibindegi tarmaqtardyń biri ózara saýdada ótkiziletin taýarlar boıynsha taýarǵa ilespe qujattarda qundy durys kórsetý problemasyn talqylaý boldy. Taraptar táýekeli joǵary eksporttaýshylardyń sanattaryn aıqyndaı otyryp, osy máseleni neǵurlym tereń pysyqtaý jáne olarmen naqty jumys isteý qajettigin qoldady.
Sondaı-aq kelissózder barysynda Qazaqstan, Qyrǵyzstan jáne Reseıdiń fıskaldyq jáne quqyq qorǵaý organdarynyń qatysýymen aldaǵy jylǵa úshjaqty ózara is-qımyldy jolǵa qoıý týraly ýaǵdalasty.
Kezdesý qorytyndysy boıynsha taraptar qol jetkizilgen ýaǵdalastyqtardy iske asyrý keden-salyq salasyndaǵy yntymaqtastyqty nyǵaıtýǵa oń serpin beretinin, bul jalpy bizdiń elderimizdiń ekonomıkasyna oń áser etetinin atap ótti.