Qarjy pıramıdasyna qatysy bar taǵy úsh adam anyqtaldy.
Qarjy pıramıdasynyń tórt uıymdastyrýshysy qamaýǵa alyndy, dep habarlaıdy Almaty-akshamy.kz Almaty polısıa departamentiniń baspasóz qyzmetine silteme jasap.
«Áńgime «Mudaraban Capital» seriktestiginiń qatysýshylary – Sh. jáne T. esimdi azamattar jaıly bolyp otyr. Olarǵa qatysty sot buryn bultartpaý sharasy retinde «kepil» sanksıasyn bergen. Sondaı-aq M. jáne K.esimdi azamat sotqa deıingi tergeý barysynda úıqamaqqa alynǵan», - dedi polısıa departamenti bastyǵynyń orynbasary Rústem Ábdrahmanov.
Aıtýynsha, olar Almaty qalalyq polısıa departamentiniń tergeý basqarmasy Qazaqstan Qylmystyq kodeksiniń 217-baby 3-bóligi boıynsha tergep jatqan qylmystyq is boıynsha kúdikti dep tanyldy.
Qylmystyq is bir top azamattyń «ASTEX.KZ» JSHS, «ACD Technology» JSHS laýazymdy tulǵalarynyń qarjylyq pıramıda qurý jáne ony basqarý deregi boıynsha ujymdyq aryz negizinde Almaty qalalyq polısıa departamentinde tirkeldi.
2019 jyldyń aqpanynan 2021 jyldyń qańtaryna deıin atalǵan JSHS-niń laýazymdy tulǵalary jeke jáne zańdy tulǵalarmen memlekettik satyp alýlarǵa qatysý úshin qajet degen jeleýmen qarajat tartý úshin birlesken qyzmet týraly kelisimder jasasqany anyqtaldy.
Ekijaqty qujatqa sáıkes, fırmalar aı saıyn árbir salymshyǵa tólegen jarna somasynyń 20 prosentin tóleýge mindetti boldy. «ASTEX.KZ» JSHS 162 salymshydan 5 mıllıard teńgeden astam qarajatty basqa kompanıa – «MUDARABAN CAPITAL» JSHS arqyly alǵan.