Almatyda turatyn 826 jyldyq ótili bar temirjolshylar áýleti «Mereıli otbasy» qalalyq baıqaýynyń jeńimpazy atandy
«Mereıli otbasy» baıqaýynyń basty maqsaty – adamgershilik murattaryn jańǵyrtý, otbasy men nekeni qurmetteýge tárbıeleý, sondaı-aq otbasylyq qundylyqtar men qazaqstandyq otbasynyń oń ımıjin kórsetý jáne keńinen nasıhattaý.
Bıyl Almatyda baıqaýǵa 235 otbasy ótinim tústi. Aldymen aýdandyq irikteý, sodan keıin qalalyq irikteý kezeńderi ótkizildi. Temirjolshylar Qapyshevter áýleti jeńimpaz atandy. Otbasynda úsh urpaqtan 26 adam qıyn da kúrdeli temirjolshy mamandyǵyn tańdaǵan. Olardyń barlyǵynyń temirjoldaǵy jalpy eńbek ótili 826 jyl!
«Biz jeńisti kútken joqpyz, biraq erekshe qýandyq. Básekelestik úlken boldy. Endi Astanada óz qalamyzdyń jáne temirjolshylar otbasymyzdyń namysyn qorǵaý úshin muqıat daıyndalamyz. Temirjolǵa degen súıispenshilik bizdiń qanymyzda. Osynyń arqasynda biz jeńiske jettik. Biz óz mamandyǵymyzdy shyn júrekten jaqsy kóremiz», - dep óz oıymen bólisti úlken áýlettiń ári otbasynyń basshysy Murat Qapyshev.
Murattyń ákesi temirjolshy bolǵan, ol 1932 jyly osy salaǵa kelip, 1968 jyly zeınetke shyqqan. Jubaıymen birge olar segiz bala tárbıelep ósirdi. Olardyń barlyǵy ákesiniń jolyn qýyp, temirjol salasynda jumys istedi. Murat Qapyshevtiń úsh balasy bar jáne barlyǵy temirjolda jumys isteıdi.
Respýblıkalyq baıqaýdyń fınaldyq kezeńi Astanada, qyrkúıek aıynda, Otbasy kúnin merekeleý aıasynda ótedi.