Búgin Almatyda Abaı alańynda Qazaqstan Respýblıkasynyń Konstıtýsıasynyń 30 jyldyǵyna arnalǵan tórt saǵattyq merekelik konsert ótti. İs-shara Memlekettik ánurannyń oryndalýymen bastaldy.
Abaı alańyndaǵy kesh erekshe birlik pen merekelik kóńil-kúıge toly boldy. Alǵashqy sátten-aq kórermender ónerpazdarǵa qosylyp, án shyrqady, árbir ónerdi dý qol shapalaqpen, erekshe qoshemetpen qoldady. Birneshe býynǵa ortaq súıikti ánder myńdaǵan adamnyń daýsymen bir arnaǵa qosylyp, erekshe áser syılady.
Konsertke kóptegen almatylyqtar otbasymen keldi – ata-analar balalarymen, ata-ájeler nemerelerimen, jastar dostarymen birge jınalyp, merekelik kóńil-kúıdi jaqyndarymen bólisti.
Baǵdarlamada ár býyn ókilderi bas qosty: halyq ártisteri, opera ánshileri, dombyrashylar, estradanyń jas juldyzdary, bı ujymdary men etno-ansamblder kórermenderge erekshe áser syılady.
Bul keshte sahnada Roza Rymbaeva, Tamara Asar, Janar Aıjanova, Aıgúl Qosanova, Jámıla Serkebaeva, Móldir Áýelbekova, IL Canto kvarteti, «MýzArt Life» toby, Álı Oqapov, Temirlan & Yernat, Zarına Altynbaeva, Tólegen Rahymbaev, Musa Saparaly, Igor Blagodarnyı, Dıana Sharapova, Rústem Nurjigit, Aqbota-Nur Seıtmaǵanbet, İnjý Ánýarbek, Maqsat Bazarbaev, Dımash Dáýletov, Óktem Altaev, Lara Rysbaı, Asqat Tarǵyn, Beıbitgúl Nurymhojına, «Arqaıym» dýeti, Abık Jeksen, Dáýren Baıbóri, Talǵat Kúzembaev, Ernazar Juban óner kórsetti. Sonymen qatar «ASU» fólklorlyq-etnografıalyq ansambli, «Sazgen sazy» etno-ansambli jáne AL Jazz Symphony estradalyq-sımfonıalyq orkestri sahnaǵa shyqty.
Kórermenderge erekshe syı retinde «Jańa ǵasyr» teatry ashyq aspan astynda «Almaty – mahabbatym» spektaklin qoıyp, jurtshylyqtyń zor yqylasyna bólendi.
Keshtiń qorytyndysynda hedlaınerler – Yenlik pen Qaırat Nurtas óner kórsetip, konsertti túıindedi. Jalpy merekelik is-sharany 10 myńnan astam adam tamashalady.