Memleket basshysy el halqyn Konstıtýsıa kúnimen quttyqtady.
Prezıdenttiń Ata Zań kúnimen quttyqtaýy Aqordanyń resmı saıtynda jarıalandy, dep habarlaıdy Aqshamnews.kz.
"Qurmetti otandastar! Barshańyzdy Konstıtýsıa kúnimen quttyqtaımyn! Osydan 30 jyl buryn ótken referendýmda halqymyz Ata zańyn qabyldap, tarıhı tańdaýyn jasady. Konstıtýsıamyz Qazaqstan Respýblıkasy táýelsizdiginiń, qazaq memlekettiliginiń berik tuǵyryna aınaldy. Onda ultymyzdyń búginin jáne bolashaǵyn aıqyndaıtyn myzǵymas qundylyqtar men qaǵıdattar naqty kórinis tapty. Ata zań Qazaqstannyń barlyq azamatynyń múddesin ultyna, dinine qaramastan birdeı qorǵaıtyn áleýmettik memleket retindegi quqyqtyq irgetasyn qalyptastyrdy. Konstıtýsıa qoǵamdyq kelisim men ishki turaqtylyqtyń basty kepili sanalady. San túrli saladaǵy jetistikterge osy negizgi zańymyzǵa súıene otyryp qol jetkizdik. Úsh jyl buryn el damýynyń jańa tarıhı kezeńindegi mindetterge sáıkes, aýqymdy konstıtýsıalyq reforma jasaldy. Onyń basty nátıjesi – saıası júıeniń «Kúshti Prezıdent – yqpaldy Parlament – esep beretin Úkimet» tujyrymdamasynyń negizinde jańǵyrýy. Konstıtýsıalyq reformada adam quqyqtaryn qorǵaýǵa, Zań men tártip ústemdigin ornyqtyrýǵa basa mán berildi. Ata zańǵa álemdik tájirıbede buryn-sońdy bolmaǵan, ınovasıalyq sıpattaǵy birqatar jańa ereje engizildi. Qazaqstannyń konstıtýsıalyq reformasyna Venesıa komısıasy jáne ózge de bedeldi halyqaralyq uıymdar, sondaı-aq sheteldik sarapshylar oń baǵasyn berdi. Ádiletti, Taza, Qýatty ári Qaýipsiz Qazaqstan quramyz desek, azamattarymyz Ata zańdy qurmettep, onyń barlyq erejesin múltiksiz saqtaýy kerek. Qazaqstan Respýblıkasynyń strategıalyq maqsattaryna ultymyzdy jumyldyratyn Konstıtýsıamyzdyń aıasynda barsha azamatymyzdyń Otanymyzdy órkendetý úshin jasampazdyqpen eńbek etýine barlyq jaǵdaı jasalǵan. Elimizdiń barsha azamatyna zor densaýlyq, baq-bereke tileımin!", - dedi Prezıdent quttyqtaýynda.