Dezınseksıalaý 15 mamyr men 5 maýsym aralyǵynda júrgiziledi.
Almaty qalasynda aǵymdaǵy jyldyń 15 mamyrdan bastap jalpy aýdany 2424,54 ga bolatyn ormandy alqaptarda, qala saıabaqtary men skverlerinde kenelerge qarsy dezınseksıalyq óńdeý jumystarynyń ekinshi kezeńi bastaldy, dep habarlaıdy Almaty-akshamy.kz.
Óńdeý jumystarymen 8 ormandy alqap (kólemi - 1904,924 ga), 144 qala saıabaqtary men skverleri (kólemi – 519,616 ga) qamtylady jáne aýa-raıyna baılanysty (qurǵaq, jaýyn-shashynsyz kúnderi) kestege sáıkes aǵymdaǵy jyldyń 15 mamyrynan 5 maýsymǵa deıin júrgiziledi.
Dezınseksıalyq is-sharany qalalyq sanıtarıalyq-epıdemıologıalyq baqylaý qyzmetiniń mamandarynyń tikeleı baqylaýymen «Almaty qalasynyń dezınfeksıa ortalyǵy» fılıaly atqarady. Jasaqtalǵan dezbrıgadalar qajetti quraldarmen, kóliktermen jáne jeke bas qorǵanysh zattarymen jabdyqtalǵan.
Kene ensefalıtine qarsy dezınseksıalyq óńdeý jumystaryn júrgizý úshin «Favorıt» akarısıdtik preparaty qoldanylady. Preparat az ýytty jáne qaýiptiligi tómen sanatqa jatqyzylady (3-4 klass). Kenelermen kúresý úshin qoldanylatyn dozalar eń az jáne adamdar men janýarlar úshin qaýipsiz bolyp tabylady. Óńdeý jumystary tańerteńgilik saǵattarda júrgiziledi. Óńdeletin aýmaqtardyń shekaralarynda «Kenege qarsy óńdeý júrgizilýde» eskertý habarlamalary bar taqtalar ornatalady.
Almaty qalasynyń sanıtarıalyq-epıdemıologıalyq baqylaý departamenti