Kúdiktiler sońǵy ret 5 maýsymda Almatynyń Medeý aýdanynda urlyq jasaǵan.
Polısıa departamenti bastyǵynyń tergeý jónindegi orynbasary Rýstam Ábdirahmanovtyń aıtýynsha, Almatyda katalızator urlaýmen aınalysqan qylmystyq top ustaldy, dep habarlaıdy Almaty-akshamy.kz.
Top 1998, 1999 jáne 2000 jyly týǵan jastardan turǵan. Kúdiktiler sońǵy ret 5 maýsymda Almatynyń Medeý aýdanynda urlyq jasaǵan.
Kúdiktiler turǵyn úı aýlasyndaǵy «Toıota Prado» avtokóliginen katalızatory bar glýshıteldi tolyǵymen sheship alyp, sol arqyly 500 myń teńge kóleminde materıaldyq shyǵyn keltirgen. 5 maýsymda jedel izdestirý is-sharalary barysynda kúdiktiler ustaldy.
Ustalǵandar qylmystaryn moıyndap, ýaqytsha ustaý ızolátoryna qamaldy. Olardyń qalanyń Túrksib, Bostandyq, Áýezov aýdandarynda osyǵan uqsas 9 qylmys jasaýǵa qatysy bar ekeni dáleldendi.
Urlanǵan bólshekterdi qabyldap, satyp alyp otyrǵan er adam da anyqtalyp, ustaldy.
«Ol kólikterdiń katalızatorlaryn bólshektelgen kúıinde alǵanyn, sodan keıin metaldyń quramy men qunyn anyqtaıtyn arnaıy analızator arqyly baǵalaý júrgizilgenin aıtty. Sodan keıin katalızatorlardy tapsyrǵan adamǵa akt toltyryldy. Zattar odan ári zaýytqa satý úshin daıyndaldy. Búginde jedel izdestirý jáne tergeý sharalary júrgizilip jatyr», - delingen jazbada.