Almatyda qyrkúıek-mamyr aralyǵynda kartop pen sábiz qymbattamaıdy. Bul úshin 22 myń tonna kókóniske shart jasalǵan.
Almaty qalasynda áleýmettik mańyzy bar azyq-túlik baǵasyn turaqtandyrý úshin jergilikti búdjetten 10 mlrd teńge aqsha bólindi. Bul týraly Almaty qalasy kásipkerlik jáne ınvestısıa basqarma basshysynyń orynbasary Damır Tazabek málimdedi, dep habarlaıdy Almaty-akshamy.kz Informburo.kz-ke silteme jasap.
Vedomstvo ókiliniń aıtýynsha, halyq sanynyń ósýine baılanysty ónim jetispeýshiligi boldy. Sondaı-aq, buǵan postpandemıa kezinde logıstıkanyń nasharlaýy, keı eldiń shekarasyn jabýy jáne tabıǵı apattar sebep.
«Azyq-túlik baǵasynyń qymbattaýy qazir barlyq memlekette baıqalyp otyr desek bolady. Bul másele boıynsha, Almaty qalasynda baǵany turaqtandyrý qory jumys jasap jatyr. Oǵan 10 mlrd teńge kóleminde aqsha bólingen. Atalǵan qor barlyq áleýmettik mańyzdy azyq-túlikpen qamtamasyz etedi. Sondaı-aq, qala turǵyndary úshin olardy tómen baǵada satyp alý múmkindigi jasalǵan», – dedi Damır Aqanǵalıuly.
Ári qaraı maman sábiz ben kartop baǵasynyń qymbattaýy máselesine toqtaldy. Aıtýynsha, kúzden bastap bul kókónisterdiń baǵasy úshin alańdaýǵa negiz joq.
«Baǵdarlama aıasynda 22 myń tonna kókónisti forvardtyq kelisimshartpen satyp aldyq. Bul ónimder 1 qyrkúıekten 1 mamyrǵa deıin tómendetilgen baǵamen satylady. Magnum jelisinde jyl sońyna deıin 8 myń tonna, Toimart dúkenderinde 1 500 tonna ónim qarastyrylǵan. Buǵan qosa negizgi óndirýshilerde de qosymsha ónim saqtalyp tur. Almaty qalasynyń turǵyndary úshin jetkilikti. Basqarmamyz negizinen áleýmettik mańyzy bar azyq-túlik ónimderin turaqtandyrý saıasatyn júrgizedi. Jeńildikpen nesıe berý, tikeleı alyp kelgen ónimderdi tikeleı jármeńke arqyly satý syndy sharalardy da uıymdastyryp otyramyz», – dedi Damır Tazabek.