Sheteldik jáne otandyq ǵalymdar birlesip Almaty aýasynyń lastaný deńgeıin anyqtamaq.
Narhoz ýnıversıtetiniń ǵalymdary Helsınkı ýnıversıtetimen birlesip Almaty qalasy aýasynyń lastanýyn zertteýdi bastady, dep habarlaıdy Almaty-akshamy.kz Narhoz ýnıversıtetiniń baspasóz qyzmetine silteme jasap.
Bul jobany iske asyrý úshin fın mamandary jańadan 17 baqylap-zertteý qurylǵysyn jasap shyǵardy. Olardyń kómegimen aýa lastanýynyń túrli deńgeılerin anyqtaýǵa bolady.
Qurylǵylar Ekologıa, geologıa jáne tabıǵı resýrstar mınıstrligine qarasty "Qazgıdromet" RMK uıymyna tapsyryldy jáne stasıonarlyq beketterge ornalastyrylýda. Osylaısha megapolıs aýasynyń naqty lastaný deńgeıin anyqtaýǵa múmkindik týyp otyr. Alynǵan aqparat mobıldi qosymsha arqyly telefon betinde birden kórinetin bolady. Jyl sońyna deıin málimetter tolyq jınaqtalyp, taldaýdan ótedi. Zertteý nátıjeleri kópshilik úshin jarıalanady.
Atmosferalyq aýanyń lastaný máselelerin sheshýge baǵyttalǵan atalmysh joba BUU-nyń Qorshaǵan orta týraly baǵdarlamasynyń tujyrymdamasyna sáıkes júrgiziletinin atap ótý kerek.
«Aýanyń lastanýy – bul Almaty qalasyndaǵy eń ózekti máselelerdiń biri. Biz fındik áriptesterimizdiń atsalysýymen bul máseleni sheshýge taǵy bir qadam jasaıtyn jobany iske asyra alamyz. Aqparattyń dachıkten birden mobıldik qurylǵyǵa tikeleı jiberiletini óte yńǵaıly. Iaǵnı úıinen shyqqan árbir adam óz jolyndaǵy lastanǵan jerlerdi aınalyp ótetindeı etip óz baǵyt-baǵdaryn retteı alady. Al ǵalymdar men mamandar ekologıalyq máselelerdi sheshýde neǵurlym naqty derekterdi paıdalana alady», - dedi Narhoz ýnıversıtetine qarasty Turaqty damý ǵylymı-zertteý ınstıtýtynyń dırektory, ǵylym doktory Brendan Dúpreı.
Narhoz ýnıversıtetiniń mamandary «Qazgıdromet» qyzmetkerlerine dachıkti durys qoldanýdy úıretti. Sodaı-aq, bul joba osyǵan deıin Almaty qalasy Ekologıa departamentine de tanystyrylǵan bolatyn.
Ǵalymdardyń sózine súıensek, bul joba ekologıalyq máselelerdi odan ári zertteýge, tıisti sheshimder qabyldaýǵa, ǵalymdardyń, shaǵyn kásiporyndar men qala mamandarynyń múmkindikterin keńeıtýge kómektesedi. Qala turǵyndary da mobıldi qosymshadaǵy málimetti paıdalaný arqyly qalanyń eń las aımaqtarynan aýlaq júrip-turýǵa, demalýǵa múmkindik alady.