Almatyda hostel aýmaǵynda bolǵan órtke qatysty kelesini habarlaımyz.
Ǵımarattyń ıesi - «KÝSA Halyk» JSHS. Jalǵa alýshy – «ALA Hostel» JSHS, jaldaý jónindegi kelisim shart 21.09.2023 jyly jasalǵan.
Jer ýchaskesiniń nysanaly maqsaty: dúkendi paıdalaný jáne qyzmet kórsetý úshin. Bul nysan bir jarym aı buryn hostelge aınaldy. Hostel alańy 457 sharshy metrdi quraıdy.
Aıta keterligi, «QR-daǵy sáýlet, qala qurylysy jáne qurylys qyzmeti týraly» Qazaqstan Respýblıkasynyń Zańyna sáıkes úı-jaılardy qaıta jabdyqtaý kezinde ruqsat qujattaryn alý kerek. Onyń ústine Almatynyń qalalyq josparlaý jáne ýrbanıstıka basqarmasy qaıta jabdyqtaýǵa arnalǵan bastapqy ruqsat qujattaryn (APZ, sheshim) bermegen. Dúkennen hostelge fýnksıonaldyq maqsaty ózgergen kezde sanıtarlyq-epıdemıologıalyq, qurylys talaptary men órt qaýipsizdigi erejelerin oryndaýy qajet.
Hosteldi jertóle jáne jertóle qabattarynda ornalastyrýǵa sanıtarlyq-epıdemıologıalyq talaptardyń 23-tarmaǵyna sáıkes tyıym salynady.
Osylaısha, joǵaryda atalǵan mekenjaı boıynsha hostel sanıtarlyq-epıdemıologıalyq, qurylys talaptary men órt qaýipsizdigi erejelerin buza otyryp, zańsyz ornalasqan.
Aqparat habarlardyń jiberilýine oraı tolyqtyrylatyn bolady. Resmı derekkózderge ǵana silteme jasaǵan jón.