Jármeńke kúni qala turǵyndary men qonaqtaryna 420 tonna ónim usynylady, dep habarlaıdy aqshamnews.kz
2025 jyly 4-5 qazanda Almatyda Almaty oblysynyń taýar óndirýshileri men qala kásiporyndary qatysatyn keńeıtilgen aýyl sharýashylyǵy jármeńkesi ótedi. İs-shara «Bereke Fest» respýblıkalyq bastamasy aıasynda uıymdastyrylady. Jármeńke birinshi kezektegi qajetti ónimderdiń baǵasyn turaqtandyrýǵa, otandyq óndirýshilerdi qoldaýǵa jáne qazaqstandyq ónimdi tutynýdy yntalandyrýǵa baǵyttalǵan.
Jármeńkege Almaty oblysynyń 12 aýdany men Almaty jáne Qonaev qalasy qatysady. Qala turǵyndaryna 50-den astam ónim túri: et jáne sút, jemister men kókónister, shujyq ónimderi, un, jarma, ósimdik jáne mal maıy usynylady. Jármeńkedegi ónimniń jalpy kólemi 420 tonna, onyń ishinde 100 tonna et, 150 tonna jemis-kókónis, 50 tonna sút jáne 120 tonna basqa da ónimder.
Almatylyqtar men qala qonaqtary qajetti ónimderin tikeleı óndirýshilerden qoljetimdi baǵamen satyp alady.
Jármeńke saǵat 8:00-den 17:00-ge deıin Qazybek bı kóshesinde, Abylaı han dańǵylynan Panfılov kóshesine deıingi aralyqta ótedi.