Televızıalyq nusqasy «Almaty» telearnasynan kórsetiledi
«Baqyt degen – seniń bala kúnderiń». Almatyda osyndaı ataýmen ótken vokaldyq festıvál aıaqtaldy, dep habarlaıdy Almaty-akshamy.kz Almaty.tv-ge silteme jasap.
Bir aıǵa sozylǵan respýblıkalyq baıqaý bıyl 6-ret ótkizilip otyr. 6 men 16 jas aralyǵyndaǵy balalar qatysqan festıválde erekshe kózge túskender búgin gala-konsertte otandyq estrada juldyzdarymen jup bolyp óner kórsetti. Shara «Balalar jyly» aıasynda uıymdastyryldy.
Amelı Soheskaıa – baıqaýdyń eń jas qatysýshysy. 6 jastaǵy búldirshin búgingi dodada tanymal shetel juldyzynyń ánin oryndap, top jardy. Bul – sahnadaǵy alǵashqy qadamy.
«Meniń búgingi ónerim sizderge unady degen oıdamyn. Týyndyny sahnaǵa alyp shyǵý úshin biz ustazymyzben uzaq daıyndaldyq», – dedi baıqaýǵa qatysýshy Amelı Soheskaıa.
Vokaldyq baıqaý – talaby taýdaı talanatty balalardyń jolyn ashýǵa múmkindik. Jyl saıyn dástúrli túrde ótetin jobaǵa qyzyǵýshylyq tanytqandar kóbeıip keledi. Bıyldyń ózinde elimizdiń ár aımaǵynan 7 myńnan astam ótinim kelip túsipti. İrikteýden 11 bala ótti. Kastıng onlaın uıymdastyryldy.
«Taldyqorǵan qalasynan keldim. Meniń vokalǵa qatysyp júrgenime 4 jyl boldy. Búgingi konsertte Saltanat Baqaevamen birge án shyrqaımyn», – dedi baıqaýǵa qatysýshy Aıaýlym Imangeldi.
«Búgin meniń armanym oryndaldy. Men tanymal qazaqstandyq juldyzben án aıtamyn. Ol – Aıdana Medenova. Biz «Menimen bıle» atty ándi aıtamyz», – dedi baıqaýǵa qatysýshy Aıbıke Sátbaeva.
Uıymdastyrýshylardyń aıtýynsha, baıqaýdyń basqalardan ereksheligi realıtı shoý formatynda ótkizildi. Elimizdiń ár óńirinen jınalǵan qatysýshylar 1 aı Almatyda bolyp, qazaqstandyq ánshilerden sabaq alyp, kóńildi ýaqyt ótkizgen.
«Men jyl saıyn baıqaýda ádil qazylar alqasynda múshelik etemin. Bir baıqaǵanym jyl sanap balalardyń án aıtý deńgeıi ósip keledi. Olardyń arasynda juldyzy janǵan, bolashaqta úmit kúttiretin daryndy balalar da bar», – dedi ánshi Ánel Árinova.
Aıta keteıik, jobanyń aqparattyq demeýshisi – «Almaty» telearnasy. Óner juldyzdarynyń qatysýymen ótken óner dodasynyń televızıalyq nusqasy arnadan kórsetiledi.