Jeńil aqshany jaqsy kóretinder kúndizgi ýaqytta júrgen
Almaty Polısıa departamenti qaladaǵy 6 kólikti tonaǵan adamdy ustaǵandaryn málimdedi, dep habarlaıdy Almaty-akshamy.kz.
Jedel túrde anyqtalǵandaı, olar az ýaqyttyń ishinde almatylyqtardyń kólikterinen alty ret urlyq jasaǵan.
«47 jastaǵy qaskóılerdiń alty urlyǵynyń úsheýi qalanyń Alataý aýdanynda ornalasqan bazarlardyń biriniń avtoturaǵynda jasalǵan. Bir oqıǵada kúdiktiler Toyota Camry avtokóligin qolda bar quraldarmen ashyp, sol jerden 1 mıllıon 200 myń teńge, noýtbýk pen kólik ıesiniń uıaly telefonyn urlap ketken. Kúdiktiler Naýryzbaı aýdanyndaǵy jeke sektorda taǵy eki urlyq jasaǵan. Jeńil aqshany jaqsy kóretinder kúndizgi ýaqytta júrgen. Ótip bara jatqan adamdardyń nazaryn aýdarmaýǵa tyrysqan. Degenmen, keıbir qylmystyq epızodtar nazardan tys qalmady: olar beınebaqylaý júıesine túsip qalǵan», – dedi Almaty qalalyq Polısıa departamenti bastyǵynyń orynbasary Dıdar Ahanov.
Spıkerdiń aıtýynsha, urylar Krımınaldyq polısıa basqarmasy men Naýryzbaı aýdandyq polısıa basqarmasy qyzmetkerleriniń birlesip júrgizgen arnaıy is-sharasy kezinde ustalǵan.
«Kúdiktilerdiń biri – tájirıbeli ury. Sońǵy ret ol asa iri kólemdegi urlyq jáne qarý urlyǵy úshin 8 jylǵa bas bostandyǵynan aıyrylǵan. Qylmystyń taǵy bir sybaılasy – Ózbekstannyń týmasy, ol da buryn bótenniń múlkin urlaǵany úshin sotty bolǵan. Eki aıyptalýshy da qamaýǵa alyndy. Tergeý júrip jatyr», – dedi Ahanov.