4 naýryz kúni saǵat 11:22-de bolǵan 5 baldyq jer silkinisinen keıin Almatyda 384 qabyldaý pýnkti ashyldy. Onyń ishinde 229 mektep jáne 115 balabaqsha, 15 JOO, 20 kolej jáne 5 stadıon bar.
Jer dúmpýinen keıin qabyldaý pýnkterine myńǵa jýyq qala turǵyndary men qonaqtary júgingen. Mysaly, №59 qabyldaý pýnkti nemese Bóltirik Atyhanuly atyndaǵy №36 gımnazıaǵa 80-ge jýyq adam kelgen. Mektep qyzmetkerleri kelgen barlyq adamdardy tirkep, birden qaýipsiz oryndarǵa aparǵan. Pana izdegen qala turǵyndary mekteptiń birinshi qabatyndaǵy kabınetter men sportzalǵa ornalastyrylǵan. Sport kesheninde adamdarǵa arnap matras ta jaıylǵan. Sondaı-aq, bilim ordasynda adamdar úshin asqana da jumys istep tur. Bul qabyldaý pýnktine kelgen adamdardyń deni stýdentter. Jaqyn mańda jataqhanada ne hostelder turatyn stýdentter osy jerden qaýipsiz pana tapqandaryn aıtady. Degenmen, barlyq qabyldaý pýnkterine adam kóp deýge bolmaıdy. Mysaly, №16 Iaslı-sad balabaqshasy nemese №84 qabyldaý pýnktine nebári 2 adam kelgen.
Taǵy bir qabyldaý pýnkti «Dınamo» stadıonynda ornalasqan. Munda mekeme qyzmetkerleriniń málimetinshe, 70-ten astam turǵyn júgingen. Onyń ishinde 20-ǵa jýyq bala bar.
- «Dınamo» stadıonynda №82 qabyldaý pýnkti ornalasqan. Jer silkinisinen keıin kelgen barlyq adamdardy qarsy aldyq. Tańerteńnen beri 70 adamdaı boldy. Onyń birazy úılerine qaıtip úlgerdi. Qazir 20 shaqty turǵyn áli de otyr. Eshkimdi qýmaımyz, adamdar qalaǵansha otyra alady. Keıbir adamdar qorqyp jatyr. Biraq biz olarmen túsindirý jumystaryn júrgizip, qaýipsizdik tehnıkasyn túsindirdik, – dedi «Dınamo» stadıonynyń qyzmetkeri Qazybek Jumanov.
