2025 jyly Almatyda taý ınfraqurylymyn damytý qarqyndy túrde jalǵasyp jatyr. Qalada 1 myń shaqyrymnan astam taýdaǵy júrginshi baǵyttary sıfrlandyryldy, onyń ishinde 750 shaqyrymǵa jýyq bóligi abattandyryldy. 7 kempıng aımaǵy quryldy, sondaı-aq aýqymdy polıgrafıalyq jáne sıfrlyq materıaldar daıyndaldy. Bul týraly Almaty qalasy Týrızm basqarmasynyń ókilderi habarlady.
Bıyl 10 basym taý baǵyty kórkeıtilip jatyr (onyń ishinde Kókjaılaý jotasyna kóteriletin baǵyttar, "Nurlytaý" mańynan bastalatyn soqpaqtar, Býtakovka baǵyty, "Halyq soqpaǵy", Kimasar men "Panorama" baǵyttary jáne t.b.). Jumys aıasynda navıgasıalyq kórsetkishter, aqparattyq taqtalar, túrli-tústi baǵyttyq belgiler, demalys alańqaılary, oryndyqtar, qorshaýlar men qaýipsizdik elementteri ornatyldy. Soqpaqtarda qulama tastardan qorǵaý qurylǵylary, aǵash ótkelder, baspaldaqtar jáne arnaıy demalys alańdary jasaqtaldy.
Alma-Arasan shıpaly bulaǵy mańyndaǵy keshendi qaıta jańǵyrtý aıaqtaldy. 775 metrlik júrginshiler soqpaǵy qaıta abattandyrylyp, eńis bólikteri bekitildi, kópirler qalpyna keltirildi jáne qaýipsizdik elementteri ornatyldy.
Qoljetimdilikti arttyrý úshin jalpy tırajy 27 500 danadan turatyn baspa ónimderi (atlas, karta jáne gıd-broshúra) daıyndaldy. Sonymen qatar úsh tilde Braıl qarpimen materıaldar ázirlendi. 110-nan astam týrısik nysan men 10 marshrýtty qamtıtyn aýdıogıd bes tilde jasaldy.
Týrızm basqarmasy taý ınfraqurylymyn damytý jáne sıfrlyq servısterdi engizý Almatyny belsendi demalysty unatatyn azamattar úshin qaýipsiz ári tartymdy ete túsetinin atap ótti. Bul ekotýrızm salasynda jańa ónimder qalyptastyrýǵa jáne týrıserdiń qalaǵa degen qyzyǵýshylyǵyn arttyrýǵa yqpal etedi.
Sonymen birge týrıserge taýda qaýipsizdik erejelerin saqtaýdy, aýa raıyn muqıat qadaǵalaýdy jáne arnaıy daıyndyqsyz nemese tıisti jabdyqsyz shyqpaý qajettigi eskertiledi.