Almatyda «Zorlyq-zombylyqsyz 16 kún» respýblıkalyq aksıasy ótýde.
Megapolıstiń tártip saqshylary aldyn alý tekserýlerin ótkizip jatyr. ÓKQ brıfıńinde Almaty qalasy polısıa departamenti ókilderi naýqannyń negizgi mindetterin atady, dep habarlaıdy Almaty-akshamy.kz.
Almaty qalalyq PD Jergilikti polısıa qyzmeti basqarmasy bastyǵynyń orynbasary, polısıa polkovnıgi Dıas Dýanbekovtyń aıtýynsha, polısıaǵa kún saıyn 10-15 aryz túsedi, biraq zorlyq-zombylyq qurbandarynyń bári birdeı kómekke júginbeıdi. Kóp jaǵdaıda janjaldar polısıa qyzmeti kelgennen keıin sheshiledi nemese odan ary istiń mán-jaıy anyqtalmaı jatyp, bergen aryzdan bas tartyp jatatyn jaǵdaılar kezdesip jatady.
«Polısıanyń negizgi róli - qylmys pen aýyr zardaptardyń aldyn alý. Aldyn alý Qazaqstan Respýblıkasyndaǵy zańnamanyń negizgi tutqasy bolyp tabylady. Ákimshilik jáne aldyn alý sharalary sıaqty barlyq ádis-tásilder bar. Kóp jaǵdaıda jábirlenýshiler otbasyndaǵy zorlyq-zombylyqqa tózedi, bul kóbinese qaıǵyly saldarǵa ákeledi. Máselen, bir áıeldiń turmysqa shyqqanyna 9 jyl bolǵan, eki balasy bar. 7 jyl boıy kúıeýinen turmystyq zorlyq-zombylyq kórgen ol polısıadan kómek surap kórmegen. Al aýyr dene jaraqatyn alǵannan keıin ǵana polısıaǵa aryzdanǵan», — deıdi Dıas Dýanbekov.
Spıker áıelderdiń otbasyndaǵy zorlyq-zombylyqqa shydaı júre bermeı, qysylmaı kómek suraýlary kerektigin eske saldy.
PD ókili zorlyq-zombylyq qurbany aryzdanyp kelgen jaǵdaıda qalaı áreket etý kerektigin aıtty.
«Biz kelip, quqyqbuzýshyqqa qatysty mán-jaıdy anyqtaımyz. Kúsh kórsetilip, denege zaqym keltirilse, densaýlyqqa zıan keltirý faktisi boıynsha ákimshilik is qozǵaımyz. Eger bul qarapaıym uryp-soǵý bolsa, oǵan tıisti jaza qarastyrylǵan. Eger mundaı faktiler tirkelmegen bolsa, biraq jaı ǵana janjal bolsa, ondabiz agresormen tıisti jumystardy júrgizemiz.10 táýlikke deıin qamaý túrinde jazalaý qarastyrylǵan. Biz olardy esepke alyp, bir aı boıy onyń ózin qalaı ustaıtynyn baqylaımyz», - deıdi ol.
Aıta keteıik, bıyl turmystyq zorlyq-zombylyq qurbandarynan 8 myńnan astam aryz-shaǵym tirkelip, onyń 20 paıyzy jaýapkershilkke tartyldy. Qalǵan janjaldar polısıa qyzmetkerleriniń kelýimen retteldi. 7 myń adam profılaktıkalyq esepke alyndy.
Almaty qalalyq PD Jergilikti polısıa qyzmeti basqarmasynyń áıelderdi zorlyq-zombylyqtan qorǵaý tobynyń aǵa ınspektory Aqbota Ábilqasymovanyń aıtýynsha, daǵdarys ortalyqtary da belsendi túrde atsalysýda, onda quqyqtyq keńester men psıhologıalyq kómek kórsetetin senim telefondary jumys isteıdi.
«Polısıaǵa júgingen turmystyq zorlyq-zombylyq qurbandaryna biz olardyń konstıtýsıalyq quqyqtaryn qorǵaý úshin barlyq sharalardy qoldanyp jatqanymyzdy atap ótkim keledi. Biraq keıde áıelder psıhologıalyq jáne áleýmettik kómeke de zárý, biz olardy zorlyq-zombylyq qurbandaryna kómek kórsetetin daǵdarys ortalyqtaryna jiberemiz. Kópten beri «Jansaıa» memlekettik panalaý ornymen birlese jumys istep kelemiz. Ol jerde 50 tósek bar, ol barlyq standarttarǵa saı. Turmystyq zorlyq-zombylyqtan zardap shekken áıelderge de tolyqqandy áleýmettik qoldaý kórsetiledi», - dedi Aqbota Ábilqasymova.
Odan bólek, volonterlar da polıseılerge belsendi kómek kórsetedi. Olar «Turmys», «Otbasynda zorlyq-zombylyqqa jol jol», «Baqytty otbasy» sıaqty jedel aldyn alý sharalaryna qatysady.
«Almatyda volonterlar kóp. Olar «Jansaıa» jáne «Analar úıi» daǵdarys ortalyqtaryna kómektesedi. Eriktiler túrli is-sharalarǵa qatysady. Olar Abylaı han dańǵyly, 79 mekenjaıynda ornalasqan. Ol jerge túrli aryz-shaǵymyn aıtýshylar barady», - deıdi Almaty qalasy PD Almaly aýdandyq polısıa basqarmasynyń áıelderdi zorlyq-zombylyqtan qorǵaý tobynyń aǵa ınspektory Larıda Slamdjanova.
Brıfıń sońynda spıkerler eger otbasyndaǵy zorlyq-zombylyq jaıly sizge belgili bolsa, bolmasa, ózińiz qandaı da bir zorlyq-zombylyq qurbany bolsańyz, ol týraly jasyrýdyń qajeti joq ekenin eske saldy.
Polısıaǵa «102» nómiri boıynsha júginý kerek.