Ol Aýstralıa ashyq chempıonatynda óner kórsetedi.
Qazaqstandyq Anna Danılına juptyq synda alǵash ret álemdegi úzdik on tenısshiniń qataryna kirdi, dep habarlaıdy Almaty-akshamy.kz.
Qazaqstan tenıs federasıasynyń málimetinshe, Danılına búgin jańartylǵan álemdik reıtıńide 11-den 10-orynǵa kóterildi. Bul - onyń sporttyq jolyndaǵy jeke rekordy.
Anna úndistandyq Saná Mırzamen birge Adelaıda-2 WTA 500 týrnıriniń alǵashqy aınalymynda jarystyń birinshi raketkalary chehıalyq Barbora Kreıchıkova men aýstralıalyq Storm Sanderspen sheberlik baıqasty.
Tartysty kezdesýde birinshi partıada qazaqstandyq-úndistandyq jup 6:3 esebimen basymdyq tanytty. Ekinshi sette qarsylastary dál sondaı eseppen ese qaıyrdy. Sýper taı-breıkte B.Kreıchıkova men S.Sanders jeńisti julyp aldy – 10:6.
Endi Danılına Mırzamen birge jyldyń basty týrnırleriniń biri – Aýstralıa ashyq chempıonatynda óner kórsetedi.