Reıd jumystary júrip jatyr
İshki ister mınıstrligi kesheden beri jol qozǵalysy qaýipsizdigine baılanysty reıd jumystaryn júrgizip jatyr, dep habarlaıdy Almaty-akshamy.kz Almaty.tv-ge silteme jasap.
Elimizde joldarda kólikterdi tekserý kúsheıtildi. İshki ister mınıstrligi kesheden beri jol qozǵalysy qaýipsizdigine baılanysty reıd jumystaryn júrgizip jatyr. Búgin tekseris Almaty-Uzynaǵash jáne Almaty-Bishkek tasjoldarynda júrgizildi. Nebári 4 saǵattyń ishinde 30-ǵa jýyq hattama toltyrylyp, ereje buzǵan júrgizýshilerge aıyppul salyndy.
Tasjoldaǵy tańǵy tekseris jol kólik keptelisin týdyrǵan júrgizýshilerge hattama toltyrýdan bastaldy. Erejeni eskermegender endi 22 myń teńge aıyppul tóleıdi. Al joldyń qarama-qarsy baǵytymen kelip, jol kólik oqıǵasyn týdyrǵandar tipti júrgizýshi kýáliginen aıyryldy.
«Joldyń shetimen qarsy baǵytqa jolǵa shyǵyp, jol erejesin buzyp jatqan júrgizýshilermen aldyn alý jumysyn júrgizip jatyrmyz», – dedi oblystyq Polısıa departamenti patrúl polısıasy batalónynyń aǵa ınspektory Bolat Tórequlov.
Asyqqandardyń aldy 43 myńnan bastap 7 myńǵa deıin aıyppul arqalady. Al kóligi buzylyp, janarmaıy taýsylǵan júrgizýshilerge túsindirme jumystary júrgizildi. Al zańdy óreskel buzǵandar jaýaptan jaltara almady.
«Qazir eki aıyppul jazyp berdi. Bárin tóleı beretin bolsaq, ne bolamyz sonda? Aldymen joldy jasasyn. 1 saǵattan artyq kepteliste turmyz», – dedi júrgizýshi Berikbaı Sársenbaev.
Keptelistiń kesirinen keıde artyq-kem júrip qoıamyz degender jol qozǵalysynyń qıyndaǵanyna osy mańdaǵy salynyp jatqan aınalma jol sebep dep otyr.
«Kúnde tańnan keshke deıin, keptelis. Jalǵyz men emes, qanshama adam júredi bul jolmen», – dedi júrgizýshi Erkin Azamat.
Jumysymyzdy biri túsinse, endi biri jekip ketedi degen polısıa qyzmetkerleri jalpaq jurttyń jumysqa qalaǵa qatynaıtynyn túsinemiz deıdi. Sol sebepti de joldaǵy keptelisti eskerip, erte shyǵýyn suraıdy.
«Almaty-Bishkek tasjolynda turmyz. 19 shaqyrymanan 21 shaqyrymǵa deıin keptelis. Keptelistiń birden-bir sebebi qazir kópir salynyp jatyr», – dedi oblystyq Patrúl polısıasy batalónynyń aǵa leıtenanty Edýard Abýltaev.
Al Raıymbek aýyldyq okrýgi mańyndaǵy aınalma joldyń qurylysy 2 mamyrdan bastap júrip jatyr. Almaty-Bishkek tasjolyndaǵy kópir qurylysy da aıaqtalýǵa jaqyn.
«25 tamyzda biz bul joldy qaıta ashamyz. Qujat boıynsha kelisimshart 2024 jylǵa deıin jasalǵan. Biraq joldy osy jyly tolyq salyp berýge tyrysamyz. Onyń úzyndyǵy 66 shaqyrym bolsa, 33 shaqyrymyna asfált tósep qoıdyq», – dedi «Bakad» jobasynyń bas arhıtektory Gúnaı Gokalp.
Merdiger mekeme ýádesinde turyp tas joldyń barlyq jolaqtary ýaqytyly ashylsa, qalaǵa qatynaıtyn kólikterdiń qozǵalysy birshama jeńildeı túsetin edi. Al ázirge qozǵalys qıyndaǵan aımaqtardy Jol Patrúldik kólikteri baqylaýda ustaıdy.