Memlekettik qoldaýdyń arqasynda barlyq talapkerler tegin oqý múmkindigine ıe boldy.
Almatyda mektep túlekteri oqýǵa túse alatyn kolejderge 14 905 búdjettik oryn bólindi. Bul, 2021 jylmen salystyrǵanda, 3500 oryn qosylǵan. Almaty qalalyq bilim basqarmasy tehnıkalyq jáne kásiptik bilim berý basqarmasynyń basshysy Erik Ábishaev ÓKQ-da ótken brıfıńte oqýǵa qabyldaý naýqany júrip jatqany týraly aıtty, dep habarlaıdy Almaty-akshamy.kz.
Eske salsaq, Qazaqstanda Memleket basshysynyń tapsyrmasymen «Tegin tehnıkalyq jáne kásiptik bilim» jobasy júzege asyrylýda.
Qasym-Jomart Toqaev balalardy erte kásiptik baǵdarlaý búgingi tańda erekshe mańyzdy dep sanaıdy. Onyń aıtýynsha, óskeleń urpaq bolashaq mamandyǵyn tańdaýda sanaly bolýy kerek.
Qalalyq bilim basqarmasy barlyq 2022 jylǵy túlekterge bolashaq bilim traektorıasyn anyqtaý úshin kolejderge tapsyrar aldynda kásibı dıagnostıkadan ótýdi usynady.
Kásibı dıagnostıkadan gz.bilimalmaty.kz saıtynda ótýge bolady.
«Bıyl Almatynyń orta arnaýly oqý oryndary men lıseılerine qabyldaý naýqany 25 maýsymnan 25 tamyzǵa deıin jalǵasady. Keshki jáne syrttaı oqýǵa qujattardy qabyldaý merzimi 25 maýsym men 20 qyrkúıek aralyǵynda. Bul rette shyǵarmashylyq daıyndyqty qajet etetin mamandyqtar boıynsha oqýǵa qujattar 20 shildege deıin, al pedagogıkalyq jáne medısınalyq mamandyqtar boıynsha 15 tamyzǵa deıin qabyldanady», — dedi Erik Ábishaev.
Memlekettik qoldaýdyń arqasynda barlyq talapkerler tegin oqý múmkindigine ıe boldy, ol úshin elektrondy úkimet pen gz.bilimalmaty.kz portaldary arqyly qujattaryn tapsyrý qajet, sonymen qatar kolejge qabyldaý jónindegi tehnıkalyq hatshylarǵa júgine alady.
«Orta býyn mamany biliktiligin tańdaǵan árbir talapkerdiń tórt mamandyq pen tórt kolejge deıin tańdaý múmkindigi bar. Mamandyq tańdaý kezinde gz.bilimalmaty.kz portalyna tirkelip, qujattardy tikeleı kolejge tapsyrý qajet», - dep túsindirdi spıker.
Eńbek biliktiligine túsetin tulǵalar úshin kolej kásiptik jaramdylyq boıynsha áńgimelesýdi uıymdastyrady, al eger memlekettik tapsyrys boıynsha orynǵa úmitkerler kóp bolsa, sertıfıkattyń ortasha baly jáne kvota sanatynyń bolýy basty mánge ıe bolady.
Óńirlik komýnıkasıalar qyzmetiniń brıfıńinde Almaty qalalyq Bilim basqarmasynyń tehnıkalyq jáne kásiptik bilim berý basqarmasynyń basshysy Erik Ábishaev búdjetke túsetinder arasynda konkýrstyq testileý merzimin jarıalady.
«Negizgi orta bilim negizinde oqýǵa túsetin tulǵalar arasyndaǵy konkýrs 19-22 tamyz aralyǵynda, jalpy orta bilim berý bazasynda jáne TjKB bazasynda 22-25 tamyz aralyǵynda ótedi. Óner jáne mádenıet mamandyǵyna túsetinder úshin 29 shilde men 2 tamyz aralyǵynda irikteý ótedi», - dedi spıker.
Sondaı-aq, Almaty qalasyndaǵy kolejderge túsý emtıhandary pedagogıkalyq, medısınalyq mamandyqtar men shyǵarmashylyq daıyndyqty qajet etetin mamandyqtar boıynsha ótetinin aıta ketken jón.
E. Ábishaev bıylǵy jyly búdjettik oryndar bólingen salalarǵa toqtaldy: «bilim» - 900 oryn, «óner-gýmanıtarlyq» - 950 oryn, «áleýmettik ǵylymdar» - 25 oryn, «bıznes, menedjment jáne quqyq» - 1000 oryn, «aqparattyq-kommýnıkasıalyq tehnologıalar» – 2058 oryn, «mashına jasaý, óńdeý ónerkásibi jáne qurylys ındýstrıasy» – 6158 oryn, «aýyl, orman, balyq sharýashylyǵy jáne veterınarıa» – 160 oryn, «densaýlyq saqtaý jáne áleýmettik qamsyzdandyrý» – 1066 oryn, «qyzmet kórsetý» –2588 oryn.
Aıta keterligi, bıyl Almatyda 83 kolejge túsýge bolady, onyń 23-i memlekettik, 60-y jekemenshik. Ótken jyldyń qorytyndysy boıynsha megapolıs kolejderinde 19 230 bilikti maman daıyndalsa, onyń 10 278-i memlekettik tapsyrys boıynsha. Barlyq túlekterdiń jumysqa ornalasý kórsetkishi 98 paıyzdy qurady.