Daýys berý joǵary uıymdastyrýshylyq deńgeıde ótýde.
395-saılaý ýchaskesi Ornalasqan №5 Qalalyq klınıkalyq aýrýhananyń pasıentteri alǵashqylardyń biri bolyp daýys berdi, dep habarlaıdy almaty-akshamy.kz.
Saılaý komısıasynyń tóraǵasy Danıar Amırovtyń aıtýynsha, búgin ýchaskede stasıonarlyq emdelýde júrgen 100-den astam adam daýys beredi dep josparlanýda.
«Bul úshin barlyq qajetti jaǵdaılar jasalǵan, naýqastardyń tizimi aldyn ala daıyndalǵan, referendým týraly aqparat bar. Qart adamdarǵa, júre almaıtyn jáne qozǵalýy qıyn naýqastarǵa arnaıy daýys berý jáshigi uıymdastyrylǵan. Barlyq talaptar saqtalýda, ýchaskede baqylaýshylar bar», - dep atap ótti saılaý komısıasynyń tóraǵasy.
«Jas baqylaýshy» birlestiginiń ókili Jibek Aıdaıqyzy ýchaskeniń jumysyn ashýǵa aldyn ala keldi. Ol respýblıkalyq referendým – búkil el úshin mańyzdy saıası oqıǵa, sondyqtan oǵan erekshe nazar aýdarylýda, baıqaýshylardyń mısıasy: daýys berýdiń zań aıasynda ótýin qadaǵalaý ekenin atap ótti. Sonymen birge, emdeý mekemesindegi naýqastardyń daýys berýi joǵary uıymdastyrýshylyq deńgeıde ótip jatqandyǵyn aıtty.
«Daýys berý prosesi belgilengen talaptarǵa sáıkes júrip jatyr, zań buzýshylyqtar tirkelgen joq. Emdelip jatqan azamattar saılaýshylar tizimine engizilip, belsendi túrde daýys berýde, barlyq uıymdastyrýshylyq-tehnıkalyq máseleler sheshilgen, komısıa zań talaptaryn saqtap jumys isteýde», - dedi baqylaýshy.