Qoǵamdyq kólik úzilissiz qyzmet kórsetýde: Almaty tasymaldaýshylary aıazǵa daıyndaýda, dep habarlaıdy Almaty-akshamy.kz
Aýa temperatýrasynyń kúrt tómendeýi men 12 jeltoqsanda jaýǵan qalyń qarǵa qaramastan qoǵamdyq kóliktiń shyǵýy 91% bolyp, úzilissiz jumys istedi.
Buǵan deıin qalalyq Mobıldilik basqarmasynyń nusqaýlyǵymen qaladaǵy tasymaldaýshy mekemeler kólik quraldaryn qysqy kezeńge daıyndaý boıynsha qajetti is-shara júrgizgen edi. Alaıda avtobýstardy jolǵa shyǵarý kezinde aýa-raıyna baılanysty tehnıkalyq aqaýlar anyqtalyp jatty. Sol sebepti avtobýstardyń bir bóligi qyzmet kórsetýge jaramsyz boldy.
Bul rette tasymaldaýshylar tarapynan aqaýlardy joıý boıynsha qajetti sharalar qabyldanýda. Barlyq avtoparkterde kezekshilik uıymdastyrylyp, jaýapty qyzmetkerlerdiń jumysy kúsheıtildi. Túnde jelige ýaqtyly shyǵý úshin qozǵaltqyshty birneshe ret jylytý júrgiziledi.
Aıta ketý kerek, reısterdiń júıeliligine qala boıynsha oryn alǵan úlken keptelister de áserin tıgizdi. Komýnaldyq qyzmetter qalanyń barlyq aýmaǵynda qar tazalaý jáne joldardy tazalaý jumysyn qarqyndy júrgizýde. Sınoptıkterdiń aıtýynsha, bir kúnde jaýyn-shashynnyń aılyq mólsheriniń 28%-y túsken. Búginde Almatyda 176 turaqty qalalyq jáne qala mańyndaǵy marshrýttar bar. Barlyǵy 2297 birlik avtobýs pen troleıbýs qyzmet kórsetedi. Marshrýttarǵa "Almatyelektrotrans" JSHS 23 jeke jáne 1 komýnaldyq avtobýs parki qyzmet kórsetedi.
Bıyl gazben júretin 600 avtobýsy men 100 troleıbýs satyp alyndy. Sondaı-aq, jeke avtoparkter de qosymsha jyljymaly birlikterdi satyp alýda. Bul shara qalanyń qoldanystaǵy avtoparkin aıtarlyqtaı jańartýǵa múmkindik beredi.