Almaty ákimi Erbolat Dosaevtyń halyqpen kezekti kezdesýi Túrksib aýdanynda ótti. Qala basshysy aýdannyń damýy jáne turǵyndardan túsken usynystar boıynsha atqarylǵan jumystar týraly aıtyp berdi. Kezdesýge 200-den astam adam keldi, - dep habarlaıdy almaty-akshamy.kz
Aýdanda komýnaldyq ınfraqurylym, atap aıtqanda ınjenerlik jelilerdi jańǵyrtý ózekti másele bolyp qala beredi. Ótken jyly 100 shaqyrymnan astam sýmen jabdyqtaý jáne sý burý jelileri salynyp, qalpyna keltirildi. Qalǵan 47 km jeli boıynsha jumystar aǵymdaǵy jyly aıaqtalady, Bul 6 myńnan astam abonentti sapaly sýmen jáne kárizben qamtamasyz etedi.
Budan basqa,bıyl Jas qanat shaǵyn aýdanynda 3 káriz-sorǵy stansıasyn ornatý aıaqtalyp, 64 km qurylys jumystary bastalady jáne 1,5 myń úıge sý qubyry men káriz jelileri tartylatyn (Avıator, Álmerek, Maıak shaǵyn aýdandary) bolady. Aýdannyń elektr jelileri de retke keltirilýde. Ótken jyly 24 shaqyrym jańa elektr jelileri salynyp, 13 transformatorlyq qosalqy stansıa qaıta jańartyldy. Jyl sońyna deıin Álmerek, Nurshashqan jáne Shýaqty shaǵyn aýdandarynda elektr jelilerin jańǵyrtý aıaqtalady, Tuzdybastaý qosalqy stansıasy paıdalanýǵa beriledi.
Almaty ákimi qaýipsizdik máselelerine, onyń ishinde aýdannyń kóshe jaryǵyna erekshe nazar aýdardy. Uzyndyǵy 7,5 km magıstraldyq kósheler boıynsha syrtqy jaryqtandyrý jelilerin jańǵyrtý naýryz aıynda aıaqtaldy. Aýdannyń jartylaı jaryqtandyrylmaǵan 100 kóshesiniń 61-i jaryqqa qosyldy, qalǵan jumystar sáýir aıynda aıaqtalady. Budan basqa, taǵy 80 ýchaske boıynsha syrtqy jaryqtandyrý jelilerin salýǵa JSQ ázirlenetin bolady.
2023 jyldyń İ toqsanynyń sońyna deıin 700-ge jýyq jańa beınekamera jáne qosymsha 96 «Sergek» aparattyq kesheni ornatylatyn mekenjaılar tizimi daıyndalady.
Aýdannyń áleýmettik ınfraqurylym máseleleri de qalanyń damýynda erekshe oryn alady. Oqýshy oryndarynyń tapshylyǵyn azaıtý úshin ótken jyly 1500 oryndyq №211 memlekettik mektep-gımnazıa salyndy. «Jaıly mektep» ulttyq jobasyn iske asyrý aıasynda 6400 oqýshyǵa arnalǵan 4 mektep salý qarastyrylǵan. № 70 arnaıy bóbekjaı ǵımaratyn seısmıkalyq kúsheıtý jumystary aıaqtalýda, aǵymdaǵy jyldyń sońyna deıin Qaırat shaǵyn aýdanynda 260 oryndyq memlekettik balabaqshanyń qurylysy aıaqtalady.
Sapaly medısınalyq qyzmet kórsetýdiń qadamdyq qoljetimdiligin qamtamasyz etý úshin kúzde Nurshashqan shaǵyn aýdanynda 100 kelýshige arnalǵan dárigerlik ambýlatorıanyń qurylysyn aıaqtaý josparlanýda.
Ekinshi toqsanda Aıbasov kóshesi boıynda 200 kelýshige arnalǵan dárigerlik ambýlatorıanyń qurylysy bastalady. Qaırat shaǵyn aýdanynda 340 kelýshige arnalǵan emhana qurylysy boıynsha JSQ ázirleýdi aıaqtaý aǵymdaǵy jyldyń maýsym aıyna josparlanǵan.
Aýdan turǵyndary úshin áleýmettik jáne sporttyq baǵyttaǵy nysandar paıda bolady. Jyldyń ekinshi jartysynda Jas qanat shaǵyn aýdanynda zamanaýı deneshynyqtyrý-saýyqtyrý kesheni, sondaı-aq áleýmettik nysandar ortalyǵy ashylady.
Qala ákimdiginiń erekshe baqylaýynda joldardyń sapasy jáne aýdan turǵyndary úshin qolaıly qalalyq orta qurý máselesi tur. Ótken jyly 13 km jolǵa ortasha jóndeý júrgizildi, al aǵymdaǵy jyly16 myń sharshy metr jol jóndeldi, 9 km trotýar salyndy. Aǵymdaǵy jyly magıstraldyq kóshelerde 24 km joldy ortasha jóndeý jáne 20 myń sharshy metrden astam joldy aǵymdaǵy jóndeý josparlanǵan.
Únemi sý basýǵa beıim 10 ýchaskeniń 8-i joıyldy. Qalǵan 2 ýchaskedegi jumystar sáýir aıynyń sońyna deıin aıaqtalady, al jyl sońyna deıin uzyndyǵy 41 km 57 ýchaskede aryq jelileri men nóser kárizderin salý jáne rekonstrýksıalaý jumystary aıaqtalady.
Jarbulaq ózeniniń arnasyn keńeıtý jáne tereńdetý boıynsha jumystar júrgizildi, uzyndyǵy 6,7 km irgeles aýmaqtar abattandyryldy, «Aspan» úlken saıabaǵy, «Maıak» toǵaıy abattandyryldy.
«Halyq qatysatyn búdjet» baǵdarlamasy boıynsha aǵymdaǵy jyly 91 jobany iske asyrý josparlanýda. Almaty ákiminiń tapsyrmasy boıynsha HQB jobasyn iske asyrýǵa bıyl qalanyń barlyq aýdandaryna qosymsha 7 mlrd teńge bólindi, onyń ishinde Túrksib aýdanyna 875 mln teńge.