Almatyda Abaı atyndaǵy Memlekettik akademıalyq opera jáne balet teatrynda qala basshysy Erbolat Dosaevtyń qatysýymen Medısına qyzmetkeri kúnine arnalǵan saltanatty jıyn ótti. İs-shara barysynda densaýlyq saqtaý salasynyń qyzmetkerlerine qurmet kórsetildi.
Merekege oraı Almaty qalasynyń densaýlyq saqtaý salasynyń ardagerleri men qyzmetkerleri túrli nagradalar – Densaýlyq saqtaý mınıstrliginiń «Eńbek ardageri» belgisimen, «Qazaqstan Respýblıkasynyń Densaýlyq saqtaý isine qosqan úlesi úshin» tósbelgisimen, «Qazaqstan Respýblıkasynyń densaýlyq isiniń úzdigi» tósbelgisimen jáne qala ákimniń atynan alǵys hattarmen marapattaldy.
Erbolat Dosaev dárigerlerdi kásibı merekelerimen quttyqtap, halyqtyń densaýlyǵyn qamtamasyz etý jáne azamattardyń ómirin saqtap qalý jolyndaǵy janqıarlyq eńbekteri úshin alǵysyn bildirdi. Bul mereke medısına qyzmetkeri eńbeginiń qanshalyqty baǵa jetpes jáne mańyzdy ekenin eske salady dep atap ótti.
Sóziniń barysynda Almaty ákimi qazirgi ýaqytta densaýlyq saqtaý júıesin jańǵyrtýdyń 2030 jylǵa deıingi keshendi baǵdarlamasyn ázirleý boıynsha jumys júrgizilip jatqanyn, ol birinshi kezekte alǵashqy medısınalyq-sanıtarlyq kómektiń tıimdiligi men qoljetimdiligin arttyrýǵa, ınfraqurylymdy jańǵyrtýǵa jáne jańa medısınalyq qyzmetterdi engizýge baǵyttalatynyn jáne kópsalaly aýrýhanalar men taǵy basqalarynda jańa tehnologıalardy engizýge baǵyttalǵanyn aıtty.
Jalpy, bıylǵy jyly Almaty qalasynyń densaýlyq saqtaý júıesine jergilikti búdjetten tartylatyn ınvestısıanyń jalpy kólemi shamamen 35 mıllıard teńgeni quraıdy. Jalpy búginde qalanyń densaýlyq saqtaý júıesinde 182 medısınalyq uıym bar, onda 38 myńnan astam maman jumys isteıdi.