Almaty ákimi Darhan Satybaldy qaladaǵy jol jóndeý jumystaryn kúzge deıin aıaqtaýdy tapsyrdy, dep habarlaıdy aqshamnews.kz tilshisi.
"Mindettemesine salǵyrt qarap, ýaqytynda oryndamaıtyn merdigerlermen kelisimshartty buzyp, jaýapsyz kompanıalar tizimine engizý qajet", – dedi Darhan Satybaldy Naýryzbaı aýdanyndaǵy jumys sapary barysynda.
Naýryzbaı aýdanyna jumys sapary aıasynda Almaty ákimi Darhan Satybaldy áleýmettik jáne ınfraqurylymdyq jobalardy júzege asyrý barysymen tanysty.
Quramys shaǵynaýdanynda qala basshysy áleýmettik ınfraqurylym nysandarynyń qurylys barysyn qarap shyqty. Atap aıtqanda, 2023 jyly tamyzda qala ákimdigi janyndaǵy jobalyq keńseniń qoldaýymen qurylysy bastalǵan 1500 oryndyq jaıly mektep salynyp jatyr. Aýdan halqynyń kóbeıýine jáne turǵyn úı qurylysynyń jappaı salynýyna baılanysty mektep tapshylyǵy máselesi áli de ózekti. 2024-2025 oqý jylynda shamamen 5 myń oqýshyǵa oryn qajet.
Sondaı-aq, sol mańda 320 balaǵa arnalǵan balabaqsha salynyp jatyr. Qazirgi ýaqytta nysan 65% daıyn.
Qurylys merzimi sozylyp ketkenin kórgen qala basshysy merdiger kompanıaǵa qatysty syn aıtty. Qurylys basqarmasyna baqylaýdy kúsheıtýdi, al mindettemesin ýaqytynda oryndamaǵan kompanıalardy jumystan shyǵaryp, jaýapsyz merdigerler tizimine engizýdi tapsyrdy.
"Bulaı bolmaıdy! Eger jumys merziminen keshigip jatsa, tıisti sheshimdi ózderińiz qabyldap, kelisimdi buzyp, kompanıany qara tizimge engizińizder. Meni ertip kelip, sheshimi joq másele dep aıtýdyń qajeti joq. Eshkim sizderge jumys isteýge kedergi jasap otyrǵan joq. Ár nysanǵa jiti baqylaý kerek", – dedi shahar basshysy.
Darhan Satybaldyǵa bıyl naýryzda qurylysy bastalǵan aýysymyna 500 qabyldaýǵa arnalǵan emhananyń da barysy týraly baıandaldy. Qurylys aıaqtalǵannan keıin bul nysan shamamen 30 myń turǵynǵa qyzmet kórsetpek. Jańa medısınalyq nysan 26-qalalyq emhananyń júktemesin jeńildetip, shaǵynaýdan turǵyndaryna qoljetimdi medısınalyq kómek kórsetýge múmkindik beredi.
Darhan Satybaldy qurylysqa baılanysty ýaqytsha jabylatyn jol jóndeý jumystaryn retke keltirýdi tapsyrdy.
"Joba bar. Injenerlik jeliler tartylyp jatyr. Qarjydan qıyndyq joq. Endi tek jumysty ýaqytynda ári sapaly atqarý kerek. Jaz mezgilinde jol qazý jumystarynyń bárin jańa oqý jyly bastalǵanǵa deıin aıaqtaý qajet", – dedi Almaty ákimi.
Budan keıin Darhan Satybaldy Aqjar shaǵynaýdanyna baryp, sý jáne káriz júıeleriniń qurylysynyń ekinshi kezeńin qarap shyqty. Joba aıasynda uzyndyǵy 82,4 shaqyrym bolatyn ınjenerlik jeliler júrgiziledi. Qazirdiń ózinde 31 km sý qubyry men 27 km káriz jelileri salynyp bitti. Qurylys pen iske qosý jumystary 2025 jyldyń jeltoqsanynda aıaqtalady dep josparlanǵan. Joba tolyǵymen júzege asqanda, 33 myńnan astam Aqjardyń turǵyn sapaly aýyzsýmen qamtylady.
Kelesi nysan – Abaı dańǵylynyń Momyshuly kóshesinen qala shekarasyna deıin sozylatyn jol qurylysy. Jalpy uzyndyǵy 5,3 shaqyrym bolatyn joldyń 4,7 km bóligi aıaqtalyp, paıdalanýǵa berilgen. Bıyl 30 mamyrda Qurylysshy kóshesinen Altyn Orda kóshesine deıingi 600 metrlik ýchaskede kólik qozǵalysy ashyldy. Qazir asfált tóseý, trotýarlar men ishki joldardy salý jumystary júrip jatyr. Joba 2025 jyldyń qarashasyna deıin aıaqtalýǵa tıis. Al ortasha jóndeý jumystary bıylǵy qazan aıynyń sońyna deıin bitedi dep josparlanyp otyr.
Sonymen qatar, ákim №7 qalalyq klınıkalyq aýrýhanaǵa da baryp, emhananyń kúrdeli jóndeý jumystarymen tanysty. Bul ǵımarat 15 jyldan beri jóndeý kórmegen. Injenerlik júıeler, shatyr jáne júk jedelsatylary ábden tozǵan.
Sapar sońynda Darhan Satybaldy aýdan ákimine barlyq nysandaǵy jumystyń sapasy men merziminiń saqtalýyn qatań baqylaýǵa alýdy júktedi.
sýretter: Almaty qalasy ákiminiń baspasózinen