Elimizdiń barlyq mektepterinde alǵashqy qońyraý soǵyldy.
Bilim kúni Bilim jáne ǵylym mınıstrliginiń qabyldaǵan sheshimine sáıkes, mektep tabaldyryǵyn alǵash attaǵan balalarǵa merekelik jıyn ótkizildi, dep habarlaıdy Almaty-akshamy.kz.
Almaty qalasyndaǵy aqıyq aqyn Muqaǵalı Maqataev atyndaǵy №140 gımnazıada «Alǵashqy qońyraý» rásimi 4 mezgilge bólinip ótkizildi. Sebebi 1 synypqa qabyldanǵan 300-ge jýyq shákirtti bir ýaqytta mektep aýlasyna jınaýdyń ózi karantın talaptaryna qaıshy keletindigi aıtpasa da túsinikti.
Ádettegideı Ánuran oryndalyp, is-sharaǵa qatysýshylardy gımnazıa dırektory Tileýbaı Sánıa Óskenbaıqyzy Bilim kúnimen quttyqtap, mektep tabaldyryǵyn attaǵan órenderine óner, bilim, ǵylym jolynda muqalmaıtyn kúsh-qaırat tiledi, "Órleý" BAUO" AQ fılıaly Almaty qalasy boıynsha PQ BAI ókili Asylbek Perýza Ózenbekqyzy sóz kezeginde mektep tabaldyryǵan tarydaı bolyp attaǵan búldirshinderdiń elin, jerin, dástúrin qurmetteıtin, saýatty, bilimdi urpaq bolyp qalyptasýyna degen izgi tilegin bildirdi.
Bilim ordasyn alǵash attaǵan búldirshin qolyndaǵy gúl shoqtary, úkili úmitin jetelegen ata-ana, qushaǵy gúlge tolǵan ustazdar mektep aýlasyn erekshe qýanyshqa bóleıdi. Alǵashqy qońyrý soǵylǵan soń, 1 synyp oqýshylaryna alǵashqy oqýlyǵy – «Álippe» úlestirildi. Ár shákirttiń júreginde máńgi saqtalatyn alǵashqy ustazdary synypqa qaraı jol bastady. Táýelsiz elimizdiń tizginin ustaıtyn búldirshinder «Álippesin» qushaqtap, bilim aıdynynyń aq kemesine minip barady.