Qazaqstan Respýblıkasynyń Prezıdenti Qasym-Jomart Toqaevtyń bıylǵy Joldaýynda óte mańyzdy máseleler qamtyldy. Sonyń ishinde men Memleket basshysynyń Ekonomıkalyq reforma jáne óńirlik damý komıtetiniń jumysyna qatysty aıtqandaryna toqtalǵym kelip otyr.
Eń aldymen, Prezıdent Qazaqstan ekonomıkasynyń pandemıa daǵdarysyna baılanysty aýyr kezeńderdi eńsergenine erekshe mán berdi. Bárimiz bilemiz, byltyr indettiń saldarynan el ekonomıkasy biraz turalap qaldy.
Bıyl endi-endi es jıyp kelemiz. Byltyrǵy ekonomıkalyq jalpy paıda 3,5 paıyzdan aspaǵan, bıylǵy kórsetkish 4,5 paıyzǵa jetip qaldy. Qurylys, taý-ken, óńdiris salalarynyń bıylǵy kórsetkishteri jaman emes. Munyń bári daǵdarys kezindegi memlekettiń durys sheshimderi men qoldaýynyń arqasy. Ekinshiden, antıkrızıstik sharalar, ıaǵnı shaǵyn jáne orta bızneske degen janashyrlyq óz nátıjesin berdi. Sondaı-aq Prezıdent «Qarapaıym zattar ekonomıkasy» baǵdarlamasy óziniń tıimdiligin dáleldegenin naqty mysaldarmen aıtty.
Baǵdarlamany júzege asyrý barysynda 3,5 myńnan astam joba iske qosylǵan, 70 myń jumys orny ashyldy. Óndirilgen ónim men kórsetilgen qyzmettiń jalpy quny 3,5 trıllıon teńge boldy. Bul degenimiz bizde osy baǵdarlamaǵa basqa álternatıv joq ekenin bildiredi. Taǵy bir aıta keterlik másele - Memleket basshysy jańa tehnologıalar men sıfrlandyrý arqyly sýdy únemdeýge kóshý qajettigine basa nazar aýdardy. Sý tapshylyǵyn aldyn alýǵa qatysty birqatar tapsyrmalar berildi. Qazirgi tańda bizdiń Ekonomıkalyq reforma jáne óńirlik damý komıtetiniń sý tapshylyǵyn joıýǵa qatysty baǵdarlamasy bar, áli de qosymsha sharalar qarastyrýdy josparlap otyrmyz. Al óńirlerdi damytýǵa qatysty aıtar bolsam, halyqty aýyz sýmen, jolmen, sıfrlyq tehnologıalarmen qamtamasyz etý jumystary qarqyndy jalǵasyn tabady dep oılaımyn.
Prezıdent barlyq salanyń basshylaryna naqty tapsyrmalar berdi. Endi tek aıtylǵan máselelerdi iske asyrý qajet. Qasym-Jomart Toqaev árdaıym halyqtyń ál-aýqatynyń jaqsarýyna mán berip keledi. Memleket basshysynyń eń tómengi jalaqy kólemin arttyrýynyń ózi halyqty yntalandyra tústi deýge bolady.