«Qazaqstan halqyna» qory tek resmı aqparatqa senýge shaqyrdy
Alaıaqtar qaıyrymdylyq uıymdarynyń biryńǵaı platformasyn paıdalanyp, qazaqstandyqtar atyna nesıe rásimdeýge talpynýda. Bul týraly «Qazaqstan halqy» qorynyń baspasóz qyzmeti málim etti, dep habarlaıdy Almaty-akshamy.kz
Tek demalys kúnderi «Atameken» UKP baılanys ortalyǵyna osyndaı shaǵymdarmen 250 adam júginse, dúısenbi, 7 aqpanda osy tektes taǵy 186 qońyraý túsken.
Ótinishterdiń birinde Shymkent qalasynyń turǵyny atamekenim.kz saıtynda kómekke ótinish berip, barlyq málimetti toltyrǵannan keıin ekranda nesıeniń sátti óńdelgeni týraly aqparat paıda bolǵanyn, sodan keıin oǵan odan ári aqshalaı nesıe rásimdeý týraly usynyspen beıneqońyraý túsken.
Dál osyndaı oqıǵa Óskemende de bolǵan. Onda qala turǵynyna elektrondy úkimettiń jalǵan portaly atynan SMS-habarlama jiberilip, odan keıin aqshalaı kómek túrinde 1 166 000 teńge alý úshin joldanǵan SMS kodyn ataýdy suraǵan alaıaq telefon soqqan.
Qordyń áleýmettik jelidegi messendjerlerine «Qazaqstan halqyna» qory atynan telefon soqqan alaıaqtar tóleýge ýáde etken 42 500 teńge kólemindegi áleýmettik járdemaqyǵa qatysty suraqtar kelip túsken.
«Qor messendjerler arqyly beıne nemese aýdıoqońyraýlar jasamaıdy. Jalǵyz baılanys quraly – qazaqstanhalqyna.kz saıty jáne atamekenim.kz qaıyrymdylyq uıymdarynyń biryńǵaı platformasy. Biz azamattardyń qaýesetterge senbeýin jáne alaıaq uıymdardyń arandatýyna berilmeýdi suraımyz. Tek resmı aqparatqa senińiz», – deıdi «Qazaqstan halqyna» qorynyń resmı ókili Álibek Ábdilov.
Sondaı-aq mundaı alaıaqtyq faktilerin aıtyp, jerlesterin eskertip júrgen qamqor jandarǵa alǵysyn bildirdi.