Búgin Naýryzbaı aýdanynynda Almaty qalasy ákimi Erbolat Dosaevtyń halyqpen kezdesýi ótti.
Onda «Jaısań» turǵyn úı keshenine qatysty másele kóterildi, dep habarlaıdy Almaty-akshamy.kz.
Suraq:
– Men zańgermin, «Jaısań» turǵyn úı keshenin salýshynyń ókilimin. Meniń suraǵym bar: joba maquldanǵan joq, nege ol jerde ruqsatsyz zańsyz qurylys júrgizilip jatyr degen syltaýmen memlekettik organdar jańadan ruqsat bermeıdi. Nelikten jańa kelisimshart jasalmaıdy?
Bul suraqqa qalalyq josparlaý jáne ýrbanıstıka basqarmasynyń basshysy Almasqan Ahmedjanov jaýap berdi.
«Arhıtektýraly josparlaý tapsyrmasy bir ǵımaratqa arnalǵan bolatyn. Basqa nysanǵa qujattar bolmady. Qurylys salýshynyń ózi ruqsatty qaıtaryp aldy, biraq soǵan qaramastan, qurylysty bastady. Normatıvtik quqyqtyq aktilerge sáıkes, aldyn ala ruqsattary, onyń ishinde memlekettik saraptamasy joq obektiler ruqsat etilmegen qurylys obektilerine jatqyzylady. Sondyqtan Qazaqstan Respýblıkasynyń Ákimshilik kodeksine sáıkes buzý máselesi qaraldy. Sot tıisti sheshim shyǵardy», - dedi qalalyq josparlaý jáne ýrbanıstıka basqarmasynyń basshysy Almasqan Ahmedjanov.
Qala ákimi de osy máselege qatysty óz pikirin bildirdi.
«Bul máseleni zań turǵysynan sheshýdi usynamyn. Sot sheshimine qarsylyq bildirgińiz kelse, apelásıalyq shaǵym túsirińiz. Eger apelásıadan keıin sot bizge sáýlet-josparlaý tapsyrmasyn maquldaýyn berýdi talap etse, biz óz tarapymyzdan ony oryndaımyz», - dedi Almaty qalasynyń ákimi Erbolat Dosaev.