Bul suraqqa Ortalyq saılaý komısıasynyń múshesi Erlan Daýylbaev jaýap berdi.
Onyń aıtýynsha, aýdandyq mańyzy bar qala, aýyl, kent, aýyldyq okrýg ákimine kandıdat ózin-ózi usynǵan jaǵdaıda, daýys berýge quqyǵy bar tıisti saılaý okrýgi saılaýshylarynyń jalpy sanynyń keminde 1 paıyz daýysynyń qoldaýyna ıe bolýy tıis. Saılaýshylardy qoldaý olardyń qoldaryn jınaýmen kýálandyrylady, dep habarlaıdy "Egemen Qazaqstan" basylymyna silteme jasaǵan Almaty-akshamy.kz
«Kandıdattardy qoldap qol jınaýdy senim bildirgen adamdar uıymdastyrady jáne ol úshin kandıdat osy Konstıtýsıalyq zańda, «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańnyń 36-babynda, memlekettik qyzmet salasyndaǵy zańnamada kózdelgen talaptarǵa sáıkestigi tekserilgennen keıin 3 kúnnen keshiktirilmeı tıisinshe aýdandyq saılaý komısıasy beretin qol qoıý paraqtarymen rásimdeledi. Toltyrylǵan qol qoıý paraqtary tıisinshe aýdandyq saılaý komısıasyna tapsyrylady. Ol 3 kún merzimde ishki ister qyzmetkerlerin tarta otyryp, jınalǵan qoldardyń rastyǵyn tekseredi jáne tıisti hattamany rásimdeıdi. Qoldardyń rastyǵyn tekserý Konstıtýsıalyq zańǵa sáıkes aýdandyq mańyzy bar qala, aýyl, kent, aýyldyq okrýg ákimine kandıdatqa qajetti anyq qoldar anyqtalǵanǵa deıin júrgiziledi», – dedi Erlan Daýylbaev.
Onyń aıtýynsha, kandıdat tirkelý úshin saıası partıalar usynǵan kezde azamattyń kandıdat bolýǵa kelisimi, ómirbaıandyq derekteri, kandıdat pen jubaıynyń aktıvteri men mindettemeleri týraly deklarasıany tapsyrǵany týraly memlekettik kiris organynyń anyqtamasy, Qazaqstannyń memlekettik qyzmetine kiretin azamatty arnaıy tekserý úshin qajetti qujattardy, saıası partıanyń saılaý jarnasyn engizgendigin kýálandyratyn qujat, kandıdattyń saıası partıaǵa músheligin rastaıtyn qujat usynýy qajet.
«Al ózin-ózi usynǵan adam kandıdat bolyp daýysqa túsý týraly ótinishin, ómirbaıandyq derekterin, kandıdat pen jubaıynyń aktıvteri men mindettemeleri týraly deklarasıany tapsyrǵany týraly memlekettik kiris organynyń anyqtamasyn, Qazaqstannyń memlekettik qyzmetine kiretin azamatty arnaıy tekserý úshin qajetti qujattardy, saılaý jarnasyn engizgeni týraly qujatty usynýy tıis. Sonymen qatar saılaý okrýgi saılaýshylarynyń jalpy sanynyń keminde 1 paıyz daýysynyń qoldaýyna ıe bolǵandyǵyn rastaıtyn aýmaqtyq saılaý komısıasynyń anyqtamasyn da usynýy kerek. Al aýdan ákimi kandıdatty usynǵan kezde joǵaryda atalǵan qujattarmen qatar, arnaýly usynysy qosa berilýi tıis. Kandıdattardy tirkeý barlyq qajetti qujattardy alǵannan keıin bastalady jáne saılaý kúninen 10 kún buryn jergilikti ýaqytpen saǵat 18.00-de aıaqtalady», –dedi Erlan Daýylbaev.