Qalada páter tonaýshysy ustaldy
Áıeldershe kıinip alǵan páter tonaýshy almatylyqtardyń úıinen quny tórt mıllıon teńge turatyn baǵaly zattardy urlap ketti, dep habarlaıdy Almaty-akshamy.kz QazAqparatqa silteme jasap.
Almaty qalalyq krımınaldyq polısıa basqarmasy men M.Áýezov aýdandyq polısıa basqarmasynyń qyzmetkerleri megapolıs aýmaǵynda birqatar urlyq jasaǵan 50 jastaǵy Ia. esimdi er adamdy ustady.
«Kúdikti páterlerge kiltti tańdaý arqyly kirip, negizinen zergerlik buıymdar men aqshany alyp ketip júrgen. Ol birneshe ret beınekameraǵa túsip qalǵan. Kúdikti is-áreketin ózgertýdi uıǵaryp, ústine áıelderdiń kıimin, basyna parık kıe bastaǵan. Onyń sońǵy jasaǵan qylmysy qarasha aıynyń basynda tirkeldi. «Jetisý-2» shaǵynaýdanynda páterden 4 mıllıon teńge bolatyn baǵaly zattardy alyp shyqqan. Qazirgi ýaqytta ustalǵan azamattyń osyǵan uqsas 8 urlyqqa qatysy bar ekeni dáleldendi», – dedi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Ustalǵan kúdikti Reseıdiń týmasy, birneshe ret urlyq jasaǵany úshin sottalǵan. Ol tergeý barysynda qamaýda otyrady. Qazir kúdiktiniń budan da basqa qylmystarǵa qatysy bar-joǵy anyqtalyp jatyr.