Ult ustazyna arnalǵan is-shara Elordada ótip jatyr
Shara QR Memlekettik hatshysy Erlan Qarınniń baıandamasymen bastaldy, dep habarlaıdy Almaty-akshamy.kz QazAqparatqa silteme jasap.
«Halqymyz óziniń tarıhynda erekshe oryny bar eki tulǵany «Ult ustazy» dep ardaqtaǵan. Aldymen, árıne, uly Abaıdy aıtamyz. Odan keıin Ahmet Baıtursynulynyń esimi atalady. Alash kósemi, qazaqtyń birtýar perzenti Ahmet Baıtursynulynyń týǵanyna bıyl 150 jyl tolyp otyr. Bul mereıtoıdy IýNESKO deńgeıinde atap ótemiz. Táýelsizdik ultymyzdyń jadyn jańǵyrtyp, tarıhı tamyrymyzdan qaıtadan nár alýymyzǵa jol ashty. Bul rette ult ustazynyń eńbegin zerdelep, ony mol murasyn urpaq sanasyna sińirý barshamyzǵa ortaq mindet. Árıne, áleýmettik jelide búgin álemde bolyp jatqan, bárimiz baıqap jatqan dúrbeleń oqıǵalar kezinde osyndaı shara ótkizýdiń qandaı mańyzy bar dep jatqandar bar. Biraq qandaı oqıǵalar oryn alsa da, biz ózimizdiń ulttyq kún tártibimizden aýytqymaýymyz kerek», - dedi Memlekettik hatshy.
Onyń paıymynsha, Ahmet Baıtursynulynyń 150 jyldyǵy - ulttyq kún tártibinde turǵan ult rýhanıaty úshin úlken bir mańyzdy taqyryptardyń biri.
«Osydan týra bir ǵasyr buryn jurtymyz ult zıalylarynyń bastamasymen Ahańnyń 50 jyldyǵyn atap ótkenin barshańyz jaqsy bilesizder. Sodan beri týra bir ǵasyr ótip otyr. Bir ǵasyrdan keıin de Ahań taǵy da ultty uıystyryp, ult zıalylaryn bir jerge jınap otyr. Bul da - urpaqtar sabaqtastyǵynyń bir belgisi. Búgin, mine, Ahań ańsaǵan táýelsiz eldiń urpaqtary onyń 150 jyldyq mereıtoıynda bas qosyp otyr», - dedi Erlan Qarın.
Q.Qýanyshbaev atyndaǵy memlekettik akademıalyq qazaq mýzykalyq-drama teatrynda ótip jatqan konferensıaǵa laýazymdy memlekettik qyzmetkerler, alys-jaqyn shet memleketterdiń ǵalymdary, alashtanýshylar, ahmettanýshylar, ádebıetshi ǵalymdar, tarıhshylar, zıaly qaýym ókilderi, depýtattar qatysyp otyr.
Sharada M. Qoıgeldıev, Sh. Qurmanbaıuly, D. Qamzabekuly, A. Fazyljanova, J.Smaǵulov, Ó. Ábdımanuly, A. İsmaqova, J. Jaqypov, Sh.Jalmahanov, A.Salqynbaı, O. Jubaeva, Q. Kúderınova, B. Momynova, U. Erkinbaı, T. Aıtova, M.Ermuhamet, T. Shanbaı, S. Aqqululy, R. Imahanbet, Q. Saq, A. Ábsadyq, E.Tileshov pen A. Qydyrshaev, t.b. zertteýshiler baıandama oqıdy. Sondaı-aq «Ahmet Baıtursynuly jáne qazaq fılologıasynyń máseleleri», «Ahmet Baıtursynuly jáne qoǵamdyq-gýmanıtarlyq ǵylymdar» atty seksıalyq otyrystar bolady.
Konferensıadan keıin saǵat 18.00-de Erkeǵalı Rahmadıev atyndaǵy memlekettik akademıalyq fılormonıada «Ult ustazy» atty ádebı-sazdy kesh ótedi.