AES salýdy qoldaý jónindegi Halyq shtaby óńirlerde turǵyndarmen kezdesýdi jalǵastyryp jatyr. Búgin Kókshetaýda shtab músheleri qutqarýshylarmen, eńbek ujymdarymen, medısına salasynyń qyzmetkerlerimen jáne ardagerlermen kezdesip, atom elektr stansıasynyń artyqshylyqtary týraly pikir almasty.
Polımerden jumsaq qaptama shyǵaratyn «Novopek» JSHS zaýytynyń eńbek ujymymen kezdesýde, shtab músheleri ónerkásiptik kásiporyndardyń júıeli jumys isteýi úshin turaqty energıamen jabdyqtaýdyń mańyzdylyǵyn atap ótti. Májilis depýtaty, «AMANAT» partıasy fraksıasy jetekshisiniń orynbasary Pavel Kazansev AES – jańa joba ǵana emes, sonymen qatar ınvestorlardy tartýǵa jáne jańa jumys oryndaryn ashýǵa qajet uzaq merzimdi sheshim ekenin aıtty.
"Biz asa mańyzdy máseleler sheshiletin dáýirde ómir súrip jatyrmyz. Onyń biri – atom energetıkasy. Elimizdiń ońtústik óńirlerinde elektr energıa tapshylyǵy paıda boldy. Atalǵan aımaqtarda gıdroenergetıkany qamtamasyz etetin qýatty ózender de, kómir óndiriletin ken oryndary da joq. Iaǵnı, birden-bir durys sheshim – AES qurylysy. Kún men jel energıasyn qazirdiń ózinde paıdalanyp kelemiz. Alaıda, olar – turaqsyz. Búgin shaıdaı ashyq aspandy erteń bult torlap turady. Atom energetıkasynyń barlyq basqa energıa kózinen aıyrmashylyǵy sol, ol uzaq jyl turaqty ári qýatty energıamen qamtamasyz ete alady. Bul – jaı ǵana qajettilik emes, zaman talaby. Mıllıondaǵan adamnyń jarqyn bolashaǵyn qamtamasyz etkimiz kelse, biz odan bas tarta almaımyz", – dedi halyq qalaýlysy Pavel Kazansev.