Táýelsiz Qazaqstannyń 11- premer-mınıstri Álıhan Smaıylov ta búgin qyzmetinen ketti.
Buǵan deıin egemendi eldiń tarıhyndaǵy úkimet basshylary kimder bolyp edi, qazir olar qaıda?
Táýelsiz Qazaqstannyń eń alǵashqy premer-mınıstri bolǵan Sergeı Tereshenko (30.03.1951-10.02.2023) týra bir jyl buryn qaıtys boldy. Tereshenko 1991-1994 jyldar aralyǵynda Qazaqstannyń úkimet basshysy qyzmetin atqardy.
1994 jyldyń qazan aıynan bastap 1997 jyldyń qazanyna deıin QR premer-mınıstri bolǵan Ákejan Qajygeldın (27 naýryz 1952 j) 1999 jyldan beri shetelde turady.
Úkimetti úshinshi bolyp basqarǵan (1997-1999 j) Nurlan Balǵymbaev (20 qarasha 1947 jyl - 14 qazan 2015 jyl) 9 jyl buryn ómirden ótti.
Úkimetti eki ret (1999-2002 j) basqarǵan Qasym-Jomart Toqaev (17 mamyr 1953 jyl) 2019 jylǵy 20 naýryzdan beri Qazaqstannyń memleket basshysy.
Úkimet basynda uzaq otyrmaǵan (2002-2003) Imanǵalı Tasmaǵambetov (9 jeltoqsan 1956 jyl) qazir Ujymdyq qaýipsizdik jónindegi shart uıymynyń bas hatshysy.
Odan keıin úkimet basy altynshy ret aýysqanda, bul orynǵa kelgen (2003-2007) Danıal Ahmetov (15 maýsym 1954) byltyr SHQO ákimi qyzmetinen bosatylǵan.
Táýelsiz Qazaqstan tarıhynda Kárim Másimov (15 maýsym 1965 jyl) te úkimet basshysy (2007-2012) qyzmetin (2014-2016) eki ret atqarǵan. 7 jyldaı ýaqyt premer-mınıstr bolǵan ol Ulttyq qaýipsizdik komıtetin basqaryp otyrǵan tusynda Qańtar oqıǵasynan keıin ustalyp, 18 jylǵa sottalyp ketti.
Úkimet basynda 2012-2014 jyldar aralyǵynda qyzmet atqarǵan Serik Ahmetov (25 maýsym 1958 jyl) te sotty boldy.
Úsh jyl (2016-2019) premer-mınıstr bolǵan – Baqytjan Saǵyntaev (13 qazan 1963 jyl) 1 aqpannan bastap Eýrazıalyq ekonomıkalyq komısıa alqasynyń tóraǵasy qyzmetine kiristi.
Saıasat sahnasynan alystap ketken kelesi premer Asqar Mamın (23 qazan 1965 jyl) de 2019-2022 jyldar aralyǵynda osy qyzmetti atqardy.
Álıhan Smaıylov (18 jeltoqsan 1972 jyl) úkimet basyna Qańtar oqıǵasynan keıin 2022 jyly keldi. Oǵan deıin burynǵy premer-mınıstr Asqar Mamınniń birinshi orynbasary qyzmetin atqarǵan.