Elimizdiń jeti óńirinde daýyldy eskertý jarıalandy
Elimizdiń birqatar aımaǵynda daýyl eskertý jarıalandy. Bul málimetpen "Qazgıdromet" RMK bólisti, dep habarlaıdy Almaty-akshamy.kz.
27 qyrkúıekte Soltústik Qazaqstan oblysynyń basym bóliginde jaýyn-shashyn túsedi. Petropavlda kún jaýyn-shashyndy bolady dep kútiledi.
Túrkistan oblysynyń da basym bóliginde 27-28 qyrkúıekte tótenshe órt qaýpi saqtalady.
27 qyrkúıekte Qyzylorda oblysy men Qyzylorda qalasynda da tótenshe órt qaýpi saqtalady.
Sınoptıkter Aqtóbe oblysynyń soltústik-shyǵysynda batystan, soltústik-batystan 16 m/s jyldamdyqpen jel soǵady dep boljap otyr.
29 qyrkúıekte Abaı oblysynda qar aralas jańbyr jaýady. Oblystyń soltústik-batysynda tuman túsedi. Oblystyń soltústiginde, ońtústiginde, batysynda soltústik-batystan ońtústik-batysqa qaraı oıysa soqqan jeldiń ekpini 15-20 m/s quraıdy, synap baǵany kúrt tómendeıdi: túnde 0...+5-ge deıin, oblystyń soltústiginde -3°C, kúndiz +2...+ 7°C.
28-29 qyrkúıekte Shyǵys Qazaqstan oblysynyń soltústigi men shyǵysynda qatty jaýyn-shashyn bolýy múmkin. 29 qyrkúıekte oblystyń soltústik-batysynda tuman túsedi. Túnde synap baǵany kúrt tómendeıdi: 0...+5°C-ge deıin, oblystyń soltústiginde, shyǵysynda -5°C, kúndiz +2...+ 7°C-ge deıin.
27 qyrkúıekte Aqmola oblysynyń soltústik-batysynda kúndiz jańbyr jaýyp, arty qarǵa ulasýy yqtımal.
Túnde oblystyń soltústiginde, ońtústiginde, kúndiz basym bóliginde batystan, soltústik-batystan ekpini 15-20 m/s jyldamdyqpen jel soǵady, Astanada – batystan, soltústik-batystan jel soǵady, kúndiz ekpini 15-20 m/s jetedi.