«Qazgıdromet» sınoptıkteriniń málimeti boıynsha, qarasha aıynyń ekinshi jartysynda elimizdiń birneshe óńirinde aýa temperatýrasy −24 gradýsqa deıin tómendeýi múmkin, dep habarlaıdy aqshamnews.kz.
Aldaǵy kúnderi Qazaqstannyń kóp bóliginde jaýyn-shashyn kútilýde. Ońtústikte qar aralas jańbyr, al soltústik jáne batys óńirlerde qar men boran bolatyny boljanyp otyr. Eldiń basym aýmaǵynda jel kúsheıedi.
Qarasha aıynyń ortasynan bastap elimizge antısıklon áser etedi. Sýyq aýa massalarynyń enýi nátıjesinde respýblıkanyń soltústik, ortalyq jáne shyǵys aımaqtarynda termometr kórsetkishteri −15–24 gradýsqa deıin tómendeýi múmkin. Al batys jáne ońtústik aımaqtarda temperatýra −3–15 gradýs aralyǵynda bolady.
Alaıda, aıazdan keıin sınoptıkterdiń boljamyna sáıkes, Qazaqstanda kún kúrt jylynady dep kútilýde. Ońtústik-SHyǵys Azıa men Jerorta teńizinen kelgen aýa massalary eldiń kóp bóliginde temperatýranyń +3–8 gradýsqa deıin kóterilýine sebep bolady. Ońtústikte temperatýra +15 gradýsqa deıin jylynýy múmkin.