Almatyda 44 000 bala men jasóspirim seksıalar men úıirmelerge tegin qatysa aldy.
Almatynyń jergilikti atqarýshy organdarynyń aldyna balalardy buqaralyq sport túrlerine belsendi tartý, sondaı-aq tegin sport seksıalary men úıirmelerin ashý mindeti qoıyldy. Memleket basshysy tapsyrmasynyń qalaı júzege asyrylyp jatqany týraly Óńirlik komýnıkasıalar qyzmetiniń brıfıńinde Almaty qalasy sport basqarmasynyń basshysy Rústem Baıseıtov aıtyp berdi, dep habarlaıdy Almaty-akshamy.kz.
Ol el Prezıdenti Qasym-Jomart Toqaevtyń 2021 jylǵy 1 mamyrdan bastap memlekettik tapsyrys aıasynda sport seksıalary men shyǵarmashylyq úıirmelerdi jan basyna normatıvtik qarjylandyrý tetigi engizilgenin eske saldy.
Baǵdarlama 4 jastan 17 jasqa deıingi balalar men jasóspirimderge, onyń ishinde erekshe qajettilikteri bar balalarǵa 71 sport túrinen sport seksıalaryna tegin qatysýǵa múmkindik beredi.
Rústem Baıseıtovtyń aıtýynsha, ótken jyly atalǵan jobany júzege asyrýǵa búdjetten 1,2 mlrd teńge bólindi, 44 000 bala men jasóspirim seksıalar men úıirmelerge tegin qatysa aldy. Fýtbol, shahmat, taekvondo, dzúdo, júzý sıaqty sport túrleri eń kóp suranysqa ıe boldy.
«Bıyl osy maqsattarǵa 3,2 mlrd teńge baǵyttaldy. Endi balalar sportpen jáne shyǵarmashylyqpen aınalysa alady. Bul ata-analar úshin tamasha múmkindik, olar bólimdi tóleýge aqsha jumsamaıdy. Bizdiń málimetterimiz boıynsha, bir balaǵa sport seksıasyna barýdyń ortasha quny aıyna 20 500 teńgeni quraıdy», - dedi qalalyq sport basqarmasynyń basshysy.
Balalar úıirmeleri men sport seksıalaryn jan basyna qarjylandyrýdy iske qosý prosesin avtomattandyrý maqsatynda Artsport.edu.kz aqparattyq júıesi ázirlendi. Búginde, vedomstvonyń málimetinshe, jetkizýshilerden 594 ótinim maquldandy. Memlekettik sporttyq tapsyrysty jan basyna normatıvtik qarjylandyrý aıasynda jattyǵýǵa sporttyń 37 túri boıynsha 44 000 bala kiristi.
Rústem Baıseıtov almatylyqtardy osy múmkindikti paıdalanyp, balalardy seksıaǵa berýge shaqyrdy.