Elordada muqtaj adamdardyń úıine gaz beriledi.
Astana ákimdigi jáne Halyk Bank Almaty jáne Saryarqa aýdandaryndaǵy 100 jeke úıdi tegin gazdandyrý týraly memorandýmǵa qol qoıdy, dep habarlaıdy Almaty-akshamy.kz.
Gazdandyrý halyqtyń áleýmettik turǵyda osal toptary (HÁOT) sanatyndaǵy azamattardyń turǵynúılerine, olardyń arasynda jalǵyzbasty zeınetkerlerge, kóp balaly otbasylarǵa jáne múgedektigi bar adamdarǵa júrgiziledi.
Jalpy búdjeti 230 mln teńgeni gazdandyrý jobasy Halyk Bank-tyń 100 jyldyǵyna arnalǵan «100 ıgi is» aýqymdy naýqany aıasynda iske asyrylýda. 2023 jyly Halyk Bank qarajaty esebinen muqtajdyǵy bar otbasylarǵa 230-ǵa jýyq turǵyn úıi – Astanadaǵy 100 úıdi jáne Almaty qalasynyń Naýryzbaı, Alataý jáne Medeý aýdandarynda turatyn 130 úıdi gazǵa tolyqtaı qosý úshin qarjylandyrý josparlanýda.
«Astanada Almaty jáne Saryarqa aýdandary gazben tolyq qamtamasyz etilgen. Bul shamamen – 12 myń otbasy. Onyń ishinde 8 myńnan astam abonent gazǵa qosyldy. Úılerdi gazǵa qosý shyǵyndaryn azaıtý úshin úlken júıeli jumys júrgizýdemiz: halyqtyń áleýmettik osal toptary úshin 450 myń teńgege jýyq somaǵa gazdandyrý shyǵyndaryna ótemaqy kózdelgen, sondaı-aq quny 150 myń teńgege jýyq esepteý aspaptary tegin beriledi. Buryn bankpen paıyzsyz nesıeleý baǵdarlamasy iske qosylǵan bolatyn. Endi Halyk Bank-pen birlesip, elordadaǵy 100 úıdi tegin gazdandyrý jobasyn iske asyrýǵa kirisemiz. Qalǵan aýdandar boıynsha gaz qubyryn jetkizý jelilerin, kvartalishilik jelilerdi salý jumystary kelesi jyly júrgiziledi. Gazdandyrý prosesi Memleket basshysynyń baqylaýynda», – dedi Astana ákimi Jeńis Qasymbek.
Qazirgi ýaqytta elorda ákimshiligi HÁOT sanatyna jatatyn muqtaj adamdardyń tizimin usyndy. Olarǵa materıaldyq jaǵdaıy gazdandyrýdy óz betinshe tóleýge múmkindigi joq turǵyndar engizildi.
Banktiń Basqarma tóraǵasy Úmit Shaıahmetovanyń aıtýynsha, Halyk Bank birneshe jyl boıy gazdandyrý máselesin sheshýge óz resýrstaryn salýda: «Biz qazaqstandyqtardyń ómir súrý sapasyn arttyrý úshin bank qyzmetterin jetildirý arqyly da, búkil respýblıka boıynsha áleýmettik jobalardy iske asyrý arqyly da únemi jumys istep kelemiz. 2021 jyly bank Almatyda jalpy somasy 92 mln teńgege 100 jeke úıdi tolyqtaı gazdandyrýdy qarjylandyrdy, sondaı-aq turǵyn úılerge gaz júrgizýge jeńildikpen nesıe berýdiń jeke baǵdarlamasyn iske qosty. Gazdandyrý jobasyn jalǵastyra jáne keńeıte otyryp, biz birden eki mindetti – otandastarymyzdyń neǵurlym osal toptaryna kómektesýge jáne eldegi ekologıalyq jaǵdaıdy jaqsartýǵa barynsha úles qosýǵa tyrysamyz».
Qazaqstannyń barlyq aımaqtary úshin gazdandyrý máselesi ózekti kúıinde qalyp otyr. Jyl basynda Úkimet otyrysynda Premer-Mınıstr Álıhan Smaıylov memleket basshysynyń eldegi gazdandyrý deńgeıin 60 paıyzǵajetkizý týraly tapsyrmasyn eske saldy. Ol úshin 11,8 mıllıonnan astam turǵyny bar 1800-den astam eldi meken gazdandyrylýy tıis. Bank memlekettiń, bıznestiń jáne azamattardyń birlesken jáne jan-jaqty kúsh-jigeri qazaqstandyqtardyń ómir súrý sapasyn jaqsartýǵa, oń ózgeristerge ákeletinine senimdi.