Ulttyq bank qolma-qol shetel valútasyn syrtqa shyǵarýdy shekteý týraly málimdeme jasady, dep habarlaıdy Almaty-akshamy.kz
Búgingi tańda syrtqy kúızelisterdiń saldarynan qolma-qol shetel valútasyna suranys artqany baıqalady.
QR ekinshi deńgeıli bankterde shottardaǵy, depozıtterdegi jáne baǵaly qaǵazdardaǵy qaldyq túrindegi ótimdi valútalyq aktıvterdiń jetkilikti kólemi bar.
Soǵan qaramastan, qolma-qol shetel valútasyna degen suranysty qanaǵattandyrýda – qolma-qol shetel valútasyn basqa elderden Qazaqstanǵa jetkizý isinde logıstıkalyq qıyndyqtar týyndap otyr.
Qarjylyq turaqtylyqqa tónetin qaterler men alypsatarlyqqa qatysty suranystyń qysymyn tómendetý úshin Qazaqstan Respýblıkasy Prezıdentiniń Jarlyǵymen Qazaqstan Respýblıkasy Úkimeti men Qazaqstan Respýblıkasy Ulttyq bankiniń usynysy negizinde Qazaqstannan alyp shyǵýǵa shekteýler engizildi:
1) 10 000 (on myń) AQSH dollary ekvıvalentinen asatyn jáne Qazaqstan Respýblıkasy Ulttyq bankiniń áketý kúnine belgilengen baǵamy boıynsha eseptelgen somadaǵy qolma-qol shetel valútasyna jáne (nemese) shetel valútasyndaǵy aqsha quraldaryna;
2) tazartylǵan altynnyń 5, 10, 20, 50 jáne 100 gram altyn quımalary jáne Qazaqstan Respýblıkasynyń Ulttyq Banki shyǵarǵan altynnan, kúmisten jasalǵan ınvestısıalyq monetalaryna, sondaı-aq salmaǵy 100 gramnan asatyn tazartylǵan altynǵa.
Qabyldanǵan bul sharalar qolma-qol shetel valútalarynyń shekten tys syrtqa shyǵyp ketpeýin baqylaýdy, Ulttyq banktegi rezervterdiń saqtalýyn, sondaı-aq jınaq quraldaryn ártaraptandyrýdy qamtamasyz etedi.