اپات ايماقتارىندا 3 مىڭنان استام قۇتقارۋشى جۇمىستى جالعاستىرىپ جاتىر
كاحرامانماراشتا باستالعان جويقىن جەر سىلكىنىسىنەن 47 975 ادام قازا تاپتى. بۇل تۋرالى تۇركيانىڭ توتەنشە جاعدايلار باسقارماسىنىڭ (AFAD) باسشىسى يۋنۋس سەزەر مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
يۋ. سەزەردىڭ ايتۋىنشا، قازىرگى ۋاقىتتا تۇركيا ازاماتتارى، سونداي-اق كورشىلەس ەلدەردىڭ، اسىرەسە سيريادا جەر سىلكىنىسى قۇرباندارىنىڭ جالپى سانى 47 975 ادام بولدى. ونىڭ 6 278ء-ى – شەتەلدىك، نەگىزىنەن سيريا ازاماتتارى.
AFAD باسشىسى اپات ايماقتارىندا 3 مىڭنان استام قۇتقارۋشى قالىپ، جۇمىستى جالعاستىرىپ جاتقانىن ايتتى.
«ايماقتا جەراستى دۇمپۋلەرى ءالى دە جالعاسىپ جاتىر. سوندىقتان، ءبىز قۇتقارۋشىلار جاساقتارىن دايىن ۇستايمىز. باسقا ەلدەردەن تاعى 300-گە جۋىق قۇتقارۋشى دا سول جەردە قالادى»، - دەدى يۋ. سەزەر.
6 اقپاندا تۇركيادا ەپيسەنترى كاحرامانماراشتا بولعان، ماگنيتۋداسى 7 بالدان اساتىن ەكى ءزىلزالا تىركەلدى. جۇزدەگەن افتەرشوكقا ۇلاسقان جەراستى ءدۇمپۋى ەلدىڭ 10 پروۆينسياسى مەن كورشىلەس ەلدەردە، ونىڭ ىشىندە سيريادا سەزىلگەن.
ۇيىندىلەردىڭ استىنان ىزدەۋ جۇمىستارىنا 88 ەلدىڭ 11 مىڭ قۇتقارۋشىسى قاتىستى، ولاردىڭ قاتارىندا قازاقستاندىقتار دا بولدى.
تۇركياعا ءزىلزالادان كەلگەن شىعىن $100 ملرد اسۋى مۇمكىن. بۇل تۋرالى تۇركياداعى بۇۇ دامۋ باعدارلامالارىنىڭ وكىلى لۋيزا ۆينتون حابارلادى.
مامانداردىڭ ايتۋىنشا، وڭىردە ءالى جارتى جىل بويى افتەرشوكتار قايتالانادى. تۇركياداعى جويقىن ءزىلزالانى بولجاعان نيدەرلاندىلىق زەرتتەۋشى فرانك حۋگەربيتس ناۋرىزدىڭ باسىندا جاڭا اپاتتاردىڭ بولۋى مۇمكىن ەكەنىن ەسكەرتتى.
7 ناۋرىزدا حاتاي، كاحرامانماراش جانە كايسەري پروۆينسيالارىندا ءۇش جەر سىلكىنىسى تىركەلدى.