«زياتكەرلىك مارافون» ادىلەت مينيسترلىگىندە ءوتتى
قازاقستان رەسپۋبليكاسى مەملەكەتتىك قىزمەتشىلەر كۇنىنە وراي ادىلەت مينيسترلىگىنىڭ ادەپ جونىندەگى ۋاكىلى الما سىدىكوۆانىڭ ۇيىمداستىرۋىمەن مينيسترلىكتىڭ ورتالىق اپپاراتىنىڭ مەملەكەتتىك قىزمەتشىلەرى اراسىندا "زياتكەرلىك مارافون" وتكىزىلدى، دەپ حابارلادى Almaty-akshamy.kz ق ر ادىلەت مينيسترلىگىنىڭ حابارىنا سىلتەمە جاساپ.
ءىس-شارانى وتكىزۋدەگى ەڭ باستى ماقسات - مەملەكەتتىك قىزمەتشىلەردى ىنتالاندىرۋ، ۇجىمدا جاعىمدى مورالدىق-پسيحولوگيالىق احۋالدى قالىپتاستىرۋ، سونداي-اق قىزمەتكەرلەردىڭ بىلىمگە جانە ءوزىن-وزى دامىتۋعا دەگەن قىزىعۋشىلىقتارىن وياتۋ بولىپ تابىلادى. اتالعان ءىس-شارا ويىن تۇرىندە سوڭعى ۋاقىتتا ءبىلىم سالاسىندا وقۋ پروسەسىندە كەڭىنەن پايدالانىلاتىن KAHOOT باعدارلاماسىنىڭ قوسىمشاسى ارقىلى جۇرگىزىلدى. مينيسترلىكتىڭ قۇرىلىمدىق بولىمشەلەرىنەن قاتىسقان بارلىق مەملەكەتتىك قىزمەتشىلەر ءوز تاراپتارىنان اسا بەلسەندىلىك تانىتتى. ناتيجەسىندە، 1-ورىنعا زاڭناما دەپارتامەنتىنىڭ ساراپشىسى تەمىرلان مەدەربەك ۇلى، 2-ورىنعا تىركەۋ قىزمەتى جانە زاڭ كومەگىن كورسەتۋ دەپارتامەنتىنىڭ ساراپشىسى عاليا دەمە، 3-ورىنعا ساراپتامالىق قىزمەتتى ۇيىمداستىرۋ دەپارتامەنتىنىڭ ساراپشىسى دامير راحيمبەكوۆ لايىق دەپ تانىلدى.
