نازىكتىگى مەن تاباندىلىعىن ءبىر ارناعا توعىستىرعان اقتوبەنىڭ تۋماسى سالتانات – قازاق زەرگەرلىك ونەرىنىڭ بۇگىنگى جاس وكىلى. ەرلەرگە ءتان دەپ سانالىپ كەلگەن بۇل كاسىپتە بوي كورسەتىپ، كۇمىس پەن التىنعا جان ءبىتىرىپ جۇرگەن شەبەر قىزدىڭ قولتاڭباسى بۇگىندە كوپشىلىكتى تاڭداي قاقتىرادى. زەرلى اشەكەيدىڭ ءار سىزىعىندا ونىڭ سەزىمى، ءار بۇيىمىندا ورىلگەن ۇلتتىق ناقىش بار. ءبىز Qosai برەندىنىڭ يەسى سالتاناتپەن زەرگەرلىك ونەرگە كەلۋ جولى، شابىتىنىڭ باستاۋى جانە نازىك جاننىڭ بۇل كاسىپتى يگەرۋى تۋرالى اڭگىمەلەستىك.
ءيا، باستاپقىدا كوبىسى تۇسىنبەي، «ول سەنىڭ قولىڭنان كەلە مە، زەرگەرلىكتەن اينالىسۋعا كوبىنە قولدىڭ ەپتىلىگى مەن كۇشى كەرەك، ال سەن قىز بالاسىڭ عوي» دەگەن كەزدەر دە بولدى. قيىندىعى مەن قىزىعى قاتار بۇل كاسىپكە كەلۋىمە مەنىڭ وسىنداي مۇقيات جاسالاتىن جۇمىستارعا قىزىعۋشىلىعىم سەبەپ بولدى دەپ ويلايمىن.
شىعارماشىلىق باعىتتاعى جۇمىستارعا شابىت كەرەك بولاتىنى راس، ءبىراق مەن شابىت كۇتىپ كوپ ويلانبايمىن، ول وز-وزىنەن كەلەدى. ءبىر كەزدە جاي سەرۋەندەپ جۇرسەم، كەيدە مۋزىكا تىڭداعاندا شابىتتانىپ كەتەمىن، بىردە كوزىمە ءتۇسىپ قالعان بولشەكتىڭ ءوزى جاڭا يدەيا بەرەدى. ال كەيدە ءوزىمنىڭ بۇرىنعى جۇمىستارىمدى قاراپ شىعىپ تا شابىتتاناتىن ۋاقىتىم بولىپ تۇرادى.
مەن كوبىنە كۇمىسپەن جانە تابيعي تاستارمەن جۇمىس ىستەيمىن. كۇمىس – جۇمساق، يىلگىش ءارى تاريحي دۇنيەلەرگە ءتان ماتەريال، ال تابيعي تاستار ءار بۇيىمعا ءوزىنىڭ ەنەرگياسى مەن «مىنەزىن» بەرەدى. ەڭ العاشقى جاساعان بۇيىمىم – بيريۋزا تاسى ورناتىلعان، قوشقار ءمۇيىز ويۋىمەن ورنەكتەلگەن كۇمىس القا، سونى جاساپ ۇستازىما كورسەتكەنمىن، ول كىسى بۇل سەنىڭ العاشقى جۇمىسىڭ وزىڭدە ەستەلىك بولىپ قالۋى كەرەك دەدى.
كەز كەلگەن بۇيىمدى جاساۋ پروسەسى ويىڭا تۇسكەن يدەيادان باستالادى عوي، ەڭ الدىمەن ويىمدى ەسكيزگە تۇسىرەمىن، سوسىن مەتالدى دايىنداپ، كەسىپ، ءپىسىرىپ، ءپىشىنىن قالىپتايمىن، سوڭىندا وڭدەپ، جىلتىراتامىن، جۇمىس بارىسىنىڭ ءار قادامى بۇيىمدى بىرتىندەپ «ءتىرىلتىپ»، قولعا ۇستاپ، كوبەن كورەتىن دايىن دۇنيە پايدا بولادى. ەسكيزدى ءوزىم قولمەن سالامىن نەمەسە Procreate گرافيكالىق رەداكتورىن قولدانامىن. كوبىنە جاي عانا تىنىش جەردە وتىرىپ، ويىمدى قاعازعا تۇسىرگەن ۇنايدى. مەنىڭ زەرگەرلىك قولتاڭبام جۇمىستى باستان-اياق ءوز قولىممەن جاسايتىنىممەن ەرەكشەلەنەدى، ءار بۇيىمدا مەنىڭ ەنەرگيام بار، ءار اشەكەيدىڭ وزىنە تيەسىلى جەكە تاريحى دا بار، سول سەبەپتى مەن ءۇشىن زەرگەرلىك بۇيىم جانسىز زات ەمەس، ءتىرى دۇنيە سياقتى.
گەرمانيادان تۇسكەن تاپسىرىس
اشەكەي جاساعاندا كوبىنە ءوز ديزايندارىم بويىنشا تاپسىرىس الامىن، ءبىراق كەيدە كليەنتتەردىڭ يدەياسىمەن جەكە تاپسىرىستار دا جاسالادى. ءارقاشان ەسكيزدى سىزعان كەزدەن باستاپ ولارمەن حابارلاسىپ، اقىلداسىپ وتىرامىن. مەنىڭ ءستيلىم – ەتنو مەن زاماناۋي ترەندتى ۇيلەستىرگەندىكتەن كوبىنە كليەنتتەردىڭ كوڭىلىنەن شىعادى.
وسى ورايدا ەسىمدە قالعان ەرەكشە تاپسىرىس تۋرالى ايتا كەتەيىن، گەرمانيادان ءبىر كليەنت بىزدەگى جەبە القاسىنا تاپسىرىس بەردى. سويتسەك، ول كىسىنىڭ بالاسىنىڭ اتى نەمىس تىلىنەن اۋدارعاندا «جەبە» دەگەن ماعىنا بەرەدى ەكەن. سول ماعىنانى ساقتاپ، وعان ارنايى جەبە القاسىن جاساپ بەرۋ – ماعان ەرەكشە اسەر قالدىرعان تاپسىرىستاردىڭ ءبىرى بولدى.
وسى كاسىپپەن اينالىسىپ جۇرگەن سوڭ، ارينە، زەرگەرلىك ترەندتەردى دە باقىلاپ جۇرەمىن، ءبىراق ءوز ءستيلىمدى تاپقاندا، كەرىسىنشە ءوز جۇمىسىم ارقىلى ترەند جاساعىم كەلەدى. مەن ۇسىنعان يدەيالار مەن فورمالار ادامدارعا ۇناپ، جاڭا باعىتقا ىقپال ەتسە ەكەن دەگەن نيەتىم بار.
ۇقىپتىلىق پەن شىدامدىلىق - زەرگەردىڭ باستى قاسيەتى
ءار سالانىڭ ماماندارىنا عانا بەلگىلى ىشكى قيىندىعى بولاتىنى سياقتى، بۇل سالاداعى قيىندىق – وتە ۇقىپتىلىقتى، شىدامدىلىقتى تالاپ ەتەتىن، كەيدە فيزيكالىق تۇرعىدان اۋىر بولاتىن، كەيبىر كۇردەلى ديزاينى كوپ ۋاقىت الاتىن جۇمىس. ول قيىندىقتاردى ەڭسەرۋ ءۇشىن ءار قادامعا مۇقيات كوڭىل بولەمىن، شىدامدىلىق تانىتامىن جانە جۇمىسىما سۇيىسپەنشىلىكپەن قارايمىن.
زەرگەر مامان رەتىندە وسى كەزگە دەيىن كاسىبي ورتادا ءارتۇرلى تاپسىرىس بەرۋشىمەن جۇمىس ىستەپ، ولاردىڭ تالاپتارىن ءتۇسىنىپ، ءوز ستيلىممەن ۇيلەستىرە ءبىلۋ تاجىريبەسىن جينادىم. سونداي-اق ءارتۇرلى ماتەريالدارمەن، كۇردەلى ديزايندارمەن جۇمىس جاساۋ ارقىلى كاسىبي شەبەرلىگىمدى شىڭدادىم. بۇل تاجىريبە ماعان ءوز برەندىمدى قالىپتاستىرۋعا جانە شىعارماشىلىق شەشىمدەر قابىلداۋعا كومەكتەسەدى.
ءبىر بۇيىمنىڭ ەسكيزىنەن باستاپ تولىق دايىندالۋىنا دەيىن ورتاشا ەسەپپەن 3–7 كۇندەي ۋاقىت كەتەدى، ارينە، كەيبىر كۇردەلى جۇمىستار كوبىرەك ۋاقىت الادى. وسى ۋاقىتقا دەيىن مەن ءۇشىن ەڭ كۇردەلى جۇمىس – وتاۋ جۇزىك ساقيناسى بولدى. بۇل ۇلتتىق ساقينالاردىڭ بىرەگەيى، ءۇشبۇرىشتى پيراميدا تارىزدەس ەتىپ جاسالادى. ءاربىر پيراميدانىڭ بولشەكتەرىن ءدال بىردەي ەتىپ جاساپ، قولدان جيناۋ باستاپقىدا قيىن بولعانى راس. ءبىراق تاجىريبە جيناپ، قولىم ۇيرەنىپ العاننان كەيىن بۇل قيىندىق تا جەڭىلدەي باستادى.
ءار كاسىپكەردىڭ العا قويعان جوسپارى بولادى، مەن دە الداعى ۋاقىتتا زەرگەرلىك سالاسىندا كاسىبي تۇرعىدان ءوزىمدى دامىتقىم كەلەدى. جەكە ءستيلىمدى تولىق قالىپتاستىرىپ، ءوز برەندىمدى دامىتىپ، اۆتورلىق كوللەكسيالار شىعارۋ مەنىڭ باستى ماقساتىم.
برەندىمە رۋىمنىڭ اتىن بەردىم
مەنىڭ زەرگەرلىك برەندىمنىڭ اتى – قوساي. بۇل مەنىڭ رۋىمنىڭ اتى، قوساي باتىردىڭ قۇرمەتىنە قويىلعان جانە قازاق سوزىندەگى «قوسۋ، بىرىكتىرۋ» سياقتى ماعىنانى بەرەدى. سول سەبەپتى بۇل اتاۋ برەندتىڭ فيلوسوفياسىن، ياعني تاريح پەن ونەردى، ءداستۇر مەن زاماناۋي شىعارماشىلىقتى بىرىكتىرۋدى بىلدىرەدى.
ءوزىم ماماندىعىم بويىنشا ارحەولوگيالىق سۋرەتشىمىن. زەرگەرلىك ونەرمەن كاسىبي تۇردە 2019 جىلدان بەرى اينالىسىپ، سول ۋاقىتتان بەرى تاريحي جادىگەرلەردى زەرگەرلىك بۇيىمدارعا اينالدىرۋمەن كەلەمىن.
ءقازىر Qosai برەندى اقىرىنداپ دامىپ كەلەدى. الدا كوپ جۇمىستار بار، ەڭ باستىسى – بۇل جاي عانا زەرگەرلىك بۇيىمدار ساتاتىن ورىن ەمەس، ماعىناعا يە، سالماقتى برەند بولۋىن قالايمىن. سول ءۇشىن ءار بۇيىمدى ءوزىمنىڭ ءستيلىمدى جانە فيلوسوفيامدى كورسەتەتىندەي ەتىپ جاساۋعا كۇش سالامىن.
مەنىڭ وتباسىمدا زەرگەرلىككە جاقىن نەمەسە كاسىبي اينالىساتىن ادام بولعان ەمەس. اكەمنىڭ قول ۇستالىعى بار، كىشكەنتاي كەزىمدە ماعان سۋرەت سالۋعا ارنالعان مولبەرت سياقتى زاتتاردى اعاشتان جاساپ بەرەتىن. ناعاشى جاعىمدا دا سۋرەتكە جاقىن ادامدار بار.
كوزىن تاپساڭ، زەرگەرلىك - تابىستى بيزنەس
ءار كاسىپتىڭ تابىستى بولۋى ادامنىڭ قاجەتىن وتەي الۋىنا، باسقالاردان ەرەكشەلىگىندە دەپ ەدىم، ەگەر ەڭبەكتەنىپ، ءوز ءستيلىڭدى تاۋىپ، كليەنتتەرىڭدى قالىپتاستىرا الساڭ، زەرگەرلىك كاسىپتى دە تابىستى بيزنەسكە اينالدىرۋعا بولادى، ەڭ باستىسى – ساپا مەن جەكە ەرەكشەلىكتى ساقتاۋ.
ءسوز سوڭىندا زەرگەرلىككە قىزىعاتىن، وسى كاسىپپەن ايلانىسقىسى كەلەتىن جاستار بولسا، ەش قورىقپاڭىز جانە تەزىرەك باستاڭىز دەر ەدىم. باستاپقىدا ءمىنسىز بۇيىم جاسايمىن دەپ بوسقا ءتۇڭىلىپ كەتۋدىڭ كەرەگى جوق، ەڭ اۋەلى قولىڭا قۇرال الىپ، جاساپ كورگەن ماڭىزدى. شىدامدىلىق تانىتىپ، ءوز ءستيلىڭىزدى تاۋىپ، ءار بۇيىمعا جۇرەگىڭىز بەن جانىڭىزدى سالساڭىز، ءبارى ءوز جولىمەن كەلەدى.