الماتىداعى ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە بەلگىلى زەرگەر سەرىكقالي كوكەنوۆتىڭ «جاڭعىرتۋ» اتتى جەكە كورمەسى اشىلدى.
«سەرىكقالي كوكەنوۆ — كونە ادىس-تاسىلدەردى قايتا جاڭعىرتىپ زاماناۋي دەم بەرۋشى شەبەر. ونىڭ قولدانىسىندا قازاقستاندا ب.د. دەيىنگى ءىV-III عاسىرلارمەن بەلگىلەنگەن بۇرتىكتەۋ جانە سىركەلەۋ كونە ادىستەرى باسىم. ورتالىق جانە باتىس قازاقستان وڭىرلەرىندە قوندانىلاتىن، وتە ەپتىلىكتى قاجەت ەتەتىن بۇل ادىستەردىڭ زاماناۋي جاڭعىرىعى زەرگەردىڭ نەگىزگى قارۋى. زەرگەر تۋىندىلارىندا ەلىمىزدىڭ اۋماعىندا وڭدەلەتىن اسىل تاستاردى قولدانۋ ارقىلى تاقىرىپتىق بۇيىمدار جاساۋدا ىزدەنىسى سارقىلماعان. پايدالاناتىن ماتەريالدارعا مارجان، جاقۇت، كوگىلدىر اسىل تاستار، تاۋ كريستالدارى جانە ت.ب. باعالى تاستار كىرەدى»، — دەيدى كورمە جەتەكشىسى، مۋزەيدىڭ «قازاقستان ساندىك-قولدانبالى ونەرى» ءبولىمىنىڭ عىلىمي قىزمەتكەرى اقجىگىت ءنۇسىپ.
كورمە زەرگەردىڭ شىعارماشىلىعىنىڭ كەيىنگى كەزەڭىندەگى جۇمىستارىنان قۇرالعان. ەكپوزيسيادا 150-دەن استام زەرگەرلىك بۇيىم، 6 پاننو جانە 10 مۇسىندىك تۋىندىلارى تانىستىرىلدى. ءبىراز بولىگى جيىنتىقتى بۇرتىكتەۋ جانە سىركەلەۋ ادىستەرىمەن ورنىندالعان ءداستۇرلى اشەكەي بۇيىمداردان تۇرادى. ال قالعان جۇمىستارى كورىكتى جەرلەردى سيپاتتاۋ، ۇلتتىق قۇندىلىقتاردى بايانداۋ جانە ءتۇرلى تاقىرىپتاردا ورىندالعان. ءار بۇيىمنىڭ جاسالۋ ادىس-تاسىلدەرى ۇقساس بولعانىمەن، پىشىندەرى مەن تاقىرىپتىق ماعىنالارى بولەك. اشەكەيلەردىڭ بىرنەشە تۇرلەرىن ۇشتاستىرۋ ارقىلى ىزدەنىستىك شىعارمالارى دا كەزدەسەدى. نازىكتىك پەن تەرەڭ تاقىرىپتىق ىزدەنىستەردى كورمەدەن بىردەن اڭعاراسىزدار.
ەرەكشە تۋىندىلار مۋزەي تورىندە قازان ايىنىڭ 2-نە دەيىن تۇرادى.