شىمكەنتتىڭ 90 جاستاعى تۇرعىنى الاياقتاردىڭ ارباۋىنا ءتۇسىپ، جارتى ميلليون تەڭگەسىنەن ايىرىلىپ قالدى. قارت كىسىگە بەلگىسىز تۇلعا قوڭىراۋ شالىپ، ءوزىن پوليسيا قىزمەتكەرى رەتىندە تانىستىرىپ، كەلىنى جول-كولىك وقيعاسىن جاساعانىن حابارلاعان. الاياق ماسەلەنى بەلگىلى ءبىر سومامەن شەشۋگە بولاتىنىن جانە زەينەتكەردەن ول اقشانى كۋرەر الىپ كەتەتىندىگىن ايتقان. تۋىسىنا كومەكتەسۋ ءۇشىن قارت انا الاياقتارعا بارلىق جيناپ-تەرگەن قاراجاتىن، ياعني جارتى ميلليون تەڭگەسىن بەرىپ جىبەرگەن.
ىزدەستىرۋ ءىس-شارالارىنىڭ بارىسىندا ءتارتىپ ساقشىلارى بەينەباقىلاۋ كامەرالارىنىڭ كومەگىمەن جابىرلەنۋشىنىڭ ۇيىنەن قولما-قول اقشانى الۋ ءۇشىن كەلگەن تۇلعانى انىقتاپ، ۇستادى. ول 33 جاستاعى قالا تۇرعىنى بولىپ شىقتى. ءوز جاۋابىندا ۇستالعان ەر ادام مەسسەندجەر ارقىلى العان نۇسقاۋعا سايكەس ارەكەت ەتكەنىن جەتكىزدى. العان اقشانى بەلگىلى ءبىر شوتقا اۋدارۋعا كەلىسكەن ول شارتتى ورىنداماي، الاياق “جۇمىس بەرۋشىسىن” الداپ كەتكەن ەكەن.
قازىرگى تاڭدا قىلمىسقا قاتىسى بار باسقا دا تۇلعالاردى انىقتاۋعا باعىتتالعان تەرگەۋ جۇمىستارى جۇرگىزىلىپ جاتىر. قۇقىق قورعاۋشىلار ازاماتتارعا الاياقتىقتىڭ وسى ءتۇرى تۋرالى ەسكە سالادى.
پوليسيا قىزمەتكەرلەرى ازاماتتاردى الاياقتاردىڭ ارباۋىنا ءتۇسىپ قالماۋعا شاقىرادى:
- الاياقتار وزدەرىن پوليسەيلەر رەتىندە تانىستىرىپ، تۋىسىڭىزدىڭ قيىندىققا تاپ بولعانىن حابارلاپ، ماسەلەنى بەلگىلى ءبىر اقشا قاراجاتى شەشەتىنىن ايتۋى مۇمكىن. مۇنداي جاعدايدا بىردەن پوليسيانىڭ “102” نومىرىنە قوڭىراۋ شالىپ، اقپاراتتى تەكسەرىڭىز.
- ۇرەيلەنبەڭىز، اسىرەسە بەيتانىس ادامدارعا اقشا اۋدارماڭىز.
بۇل جاعداي ازاماتتاردى ساق بولۋعا جانە الاياقتاردىڭ ارباۋىنا تۇسپەۋگە شاقىرادى. قۇقىق قورعاۋ ورگاندارىنىڭ ەسكەرتۋلەرىن ەسكەرىپ، كۇدىكتى جاعدايلاردا دەرەۋ پوليسياعا حابارلاسۋ قاجەت.